اندور/ آواز دی وائس
میگھالیہ میں ہنی مون کے دوران قتل کیے گئے اندور کے ٹرانسپورٹ کاروباری راجہ رگھوونشی کے بڑے بھائی نے پیر کے روز مطالبہ کیا کہ اس معاملے کی مرکزی ملزمہ سونم کے ساتھ ساتھ اُس کے پورے خاندان کا نارکو ٹیسٹ کرایا جانا چاہیے۔
راجہ رگھوونشی (عمر 29 سال) کے قتل کی سازش میں شامل ہونے کے الزام میں اُن کی اہلیہ سونم اور اُس کے مبینہ عاشق راج کشواہاسمیت پانچ افراد کو گرفتار کیا گیا ہے۔ رگھوونشی 23 مئی کو میگھالیہ میں ہنی مون کے دوران لاپتہ ہو گئے تھے، اور شبہ ہے کہ اُسی دن اُن کا قتل کر دیا گیا تھا۔
راجہ رگھوونشی قتل کیس میں گرفتار دیگر تین ملزمان – وِشال چوہان، آکاش راجپوت، اور آنند کرمی – پر ابتدا میں ‘کرائے کے قاتل’ ہونے کا شبہ تھا، لیکن بعد میں میگھالیہ پولیس کی تفتیش میں معلوم ہوا کہ وہ راج کشواہا کے دوست ہیں۔ ملک بھر میں موضوع بحث بنے اس قتل کیس کے تمام پانچوں ملزمان اس وقت میگھالیہ پولیس کی حراست میں ہیں۔
اندور میں راجہ رگھوونشی کے گھر اُن کی تیرہویں کی رسم کے دوران، اُن کے بڑے بھائی وپِن رگھوونشی نے نامہ نگاروں سے کہا کہ ہم چاہتے ہیں کہ سونم کے ساتھ ہی اُس کے والدین، بھائی گووند اور بھابھی کا بھی نارکو ٹیسٹ کرایا جائے۔
انہوں نے مزید کہا کہ میرے چھوٹے بھائی کے قتل کے واقعات سے متعلق نئے ویڈیوز تسلسل سے سامنے آ رہے ہیں۔ ہمیں لگتا ہے کہ راجہ کے قتل میں اور لوگ بھی ملوث ہو سکتے ہیں۔ وِپن نے کہا کہ ان نئے ویڈیوز کو سوشل میڈیا پر پوسٹ کرنے والے افراد سے سختی سے پوچھ گچھ کی جانی چاہیے کہ انہوں نے یہ ویڈیوز اب تک عام کیوں نہیں کیے تھے؟
انہوں نے میگھالیہ پولیس کی تفتیش پر اطمینان کا اظہار کرتے ہوئے کہا کہ ہماری فیملی میگھالیہ پولیس کی جانچ سے مطمئن ہے۔ اسی دوران، راجہ رگھوونشی قتل کیس کی مرکزی ملزمہ سونم کا بھائی گووند اندور میں ہونے والی تیرہویں کی رسم میں شامل ہوا۔ تاہم راجہ کے اہل خانہ نے واضح کیا کہ گووند کو اس رسم کے لیے مدعو نہیں کیا گیا تھا۔
گووند نے تیرہویں کی رسم کے دوران کہا کہ میں یہاں معافی مانگنے آیا ہوں۔ اگر کسی کو ہم پر شک ہے تو ہم خود کہہ رہے ہیں کہ ہماری بھی تفتیش کی جائے۔ ہم راجہ رگھوونشی کے خاندان کے ساتھ ہیں۔ سونم کا بھائی گووند 13 جون کو اُجّین میں راجہ رگھوونشی کی پِنڈ دان کی رسم میں بھی شریک ہوا تھا۔ لیکن اب راجہ کا خاندان آہستہ آہستہ گووند سے دوری اختیار کر رہا ہے اور اُس کے تئیں ناراضگی صاف نظر آ رہی ہے۔
راجہ رگھوونشی کے ایک اور بڑے بھائی سچن نے کہا کہ میں نے تیرہویں کی رسم کے دوران گووند سے کوئی بات نہیں کی۔ وہ شاید ہمدردی دکھانے آیا ہو گا، لیکن ہم نے اُسے نہیں بلایا تھا۔
تیرہویں کی رسم میں جو کھانا بنایا گیا تھا اُس میں گلاب جامن اور وہ تمام پکوان شامل تھے جو راجہ رگھوونشی کو بہت پسند تھے۔ اس رسم میں خاندان کے قریبی رشتہ دار بھی شریک ہوئے۔
راجہ رگھوونشی کی لاش دو جون کو میگھالیہ کے ضلع ایسٹ کھاسی ہلز کے سہرہ علاقے (جسے چراپُنجی بھی کہا جاتا ہے) میں ایک آبشار کے قریب گہری کھائی سے ملی تھی۔
راجہ رگھوونشی کا خاندان ٹرانسپورٹ کے کاروبار سے وابستہ ہے۔ اُن کی شادی سونم سے 11 مئی کو اندور میں ہوئی تھی، اور وہ 20 مئی کو ہنی مون کے لیے میگھالیہ روانہ ہوئے تھے۔
میگھالیہ پولیس کی ایک خصوصی تحقیقاتی ٹیم راجہ رگھوونشی کے قتل کے معاملے کی تفصیلی تفتیش کر رہی ہے۔
