نئی دہلی: راجستھان میں شدید گرمی کا سلسلہ جاری ہے، تاہم اس دوران کئی مقامات پر ہلکی بارش اور بونداباندی بھی ریکارڈ کی گئی۔ محکمہ موسمیات کے مطابق آئندہ دنوں میں زیادہ سے زیادہ درجہ حرارت میں معمولی کمی آنے کا امکان ہے۔ موسمیاتی مرکز جے پور کے مطابق پیر کی صبح اور گزشتہ 24 گھنٹوں کے دوران ریاست کے کچھ حصوں میں گرمی کی لہر اور گرم رات (ہیٹ ویو اور ہاٹ نائٹ) ریکارڈ کی گئی، جبکہ کئی علاقوں میں بادلوں کی گرج اور تیز ہواؤں کے ساتھ ہلکی بارش یا بونداباندی بھی ہوئی۔

اس وقت راجستھان کے بیشتر علاقوں میں زیادہ سے زیادہ درجہ حرارت 44 سے 46 ڈگری سیلسیس کے درمیان ریکارڈ کیا جا رہا ہے، جو موسم کی اوسط سے زیادہ ہے۔ گزشتہ 24 گھنٹوں میں سب سے زیادہ درجہ حرارت 46.4 ڈگری سیلسیس بیکانیر کے بادلمر میں ریکارڈ کیا گیا۔ اس دوران سب سے زیادہ بارش پھلودی میں 4.0 ملی میٹر ریکارڈ کی گئی۔

موسمیاتی مرکز کے مطابق ریاست کے کچھ حصوں میں ہیٹ ویو کا سلسلہ ابھی جاری رہ سکتا ہے۔ تاہم ایک نئے مغربی اضطراب (ویسٹرن ڈسٹربنس) کے فعال ہونے اور خلیج بنگال سے آنے والی مشرقی ہواؤں کے اثر سے آئندہ 3 سے 4 دن تک دوپہر کے بعد بادلوں کی گرج کے ساتھ آندھی اور کہیں کہیں ہلکی بارش کا امکان ہے۔ محکمہ موسمیات کے مطابق آنے والے دنوں میں آندھی اور بارش کے اثر سے زیادہ سے زیادہ درجہ حرارت میں 1 سے 2 ڈگری سیلسیس کی کمی متوقع ہے۔