نئی دہلی :محکمہ موسمیات کی پیشن گوئی کے مطابق، دہلی-این سی آر میں پیر کی صبح سے ہی موسلادھار بارش ہو رہی ہے۔ صبح ہی گھنے کالے بادلوں کی وجہ سے آسمان پر اندھیرا چھا گیا۔ دہلی سے لے کر نوئیڈا اور غازی آباد تک بھی وقفے وقفے سے بارش ہو رہی ہے۔

محکمہ موسمیات کا کہنا ہے کہ دہلی، یوپی اور بہار کے بیشتر علاقوں میں اگلے دو دنوں تک بارش جاری رہ سکتی ہے۔ دوسری جانب جموں، راجستھان اور مہاراشٹر کے دارالحکومت ممبئی میں بھی بارش ہو رہی ہے۔ غور طلب ہے کہ اس وقت پورے ملک میں مانسون پوری طرح سے سرگرم ہے۔ جہاں کئی ریاستوں میں موسلادھار بارش نے گرمی سے راحت دی ہے، وہیں اس نے کچھ جگہوں پر سیلاب اور پانی جمع ہونے جیسے چیلنجز کو بھی جنم دیا ہے۔ ہندوستانی محکمہ موسمیات (IMD) نے کئی ریاستوں کے لیے مختلف الرٹ جاری کیے ہیں۔ اس کے ساتھ ہی ممبئی کے مغربی مضافاتی علاقوں میں گزشتہ چند گھنٹوں سے مسلسل بارش ہو رہی ہے۔ تاہم بارش کی شدت زیادہ نہیں ہے اور پانی جمع ہونے کی صورتحال ابھی تک سامنے نہیں آئی ہے۔ اس کے علاوہ قومی راجدھانی دہلی کے کئی حصوں میں بارش ہو رہی ہے۔

قومی راجدھانی دہلی میں پیر کو عام طور پر ابر آلود آسمان رہے گا اور درمیانی بارش کی توقع ہے۔ محکمہ موسمیات نے یہ اطلاع دی۔ آئی ایم ڈی نے دارالحکومت میں 'یلو' الرٹ جاری کیا ہے، جس میں آنے والے گھنٹوں میں گرج چمک کے ساتھ ہلکی سے درمیانی بارش کی پیش گوئی کی گئی ہے۔ محکمہ موسمیات کے مطابق پیر کو دہلی میں کم سے کم درجہ حرارت 22 ڈگری سیلسیس کے آس پاس رہنے کا امکان ہے۔ پنجاب میں بعض مقامات پر موسلادھار بارش کی پیشگوئی محکمہ موسمیات کے مطابق پنجاب میں 25 سے 28 اگست کے درمیان بعض مقامات پر اور 29 سے 30 اگست کو کئی مقامات پر ہلکی سے درمیانے درجے کی بارش کا امکان ہے۔ اس کے ساتھ ہی پنجاب میں 26 اگست تک اور 29 سے 30 اگست کے درمیان بعض مقامات پر تیز بارش کی پیش گوئی کی گئی ہے۔

ہریانہ کی پیشین گوئی کے مطابق 25-26 اگست کو کئی مقامات پر، 27-28 اگست کو بعض مقامات پر اور 29-30 اگست کو کئی مقامات پر ہلکی سے درمیانی بارش متوقع ہے۔ محکمہ موسمیات کی پیشین گوئی کے مطابق 25 اور 26 اگست کو ہریانہ میں بعض مقامات پر موسلادھار بارش کا امکان ہے۔ اوڈیشہ کے کئی حصوں میں پیر کو موسلادھار بارش متوقع ہے، جس کے پیش نظر ہندوستان کے محکمہ موسمیات (آئی ایم ڈی) نے آٹھ اضلاع کے لیے الرٹ جاری کیا ہے اور ماہی گیروں کو خبردار کیا ہے کہ وہ خراب موسم کی وجہ سے سمندر میں جانے سے گریز کریں۔ بھونیشور موسمیاتی مرکز نے اتوار کو کیندرپارا اور جگت سنگھ پور اضلاع کے لیے 25 اگست کے لیے 'اورنج الرٹ' جاری کیا، جس سے الگ تھلگ مقامات پر بھاری بارش کا امکان ظاہر کیا گیا ہے۔ کیونجھر، میور بھنج، بالاسور، بھدرک، جاج پور اور کٹک اضلاع میں پیر کے لیے ’یلو الرٹ‘ جاری کیا گیا ہے۔