نئی دہلی/ آواز دی وائس

چین اور ہندوستان کے درمیان جھڑپ کے بعد کانگریس رہنما راہل گاندھی کی جانب سے ہندوستانی فوج پر دیے گئے بیان نے نیا تنازع کھڑا کر دیا ہے۔ سپریم کورٹ کی سخت ریمارکس کے بعد معاملہ مزید گرما گیا ہے۔ بی جے پی لگاتار راہل گاندھی اور کانگریس کو نشانہ بنا رہی ہے۔ بی جے پی کا کہنا ہے کہ راہل گاندھی کی ذہنیت ملک دشمن ہے اور وہ بہادر سپاہیوں کی قربانیوں پر سوال اٹھا رہے ہیں۔ آئیے دیکھتے ہیں اس مسئلے پر کس نے کیا کہا۔

راہل گاندھی جو کہنا چاہتے ہیں، وہ پارلیمنٹ میں کیوں نہیں کہتے؟:  بی جے پی

۔9 دسمبر 2022 کو ہندوستان اور چین کی افواج کے درمیان ہونے والی جھڑپ کے بعد راہل گاندھی نے جو تبصرہ کیا، اس پر بی جے پی کے قومی ترجمان گورو بھاٹیہ نے کہا کہ راہل گاندھی جو بھی کہنا چاہتے ہیں، وہ اسے پارلیمنٹ میں کیوں نہیں کہتے؟ آخر وہ ایسی حساس باتیں سوشل میڈیا پر کیوں کرتے ہیں؟

گورو بھاٹیہ نے کہا کہ جب ہماری فوج نے بہادری دکھاتے ہوئے چینی فوج کو پیچھے دھکیلا، تب راہل گاندھی نے کہا کہ چین نے اروناچل پردیش میں 2000 مربع کلومیٹر ہندوستانی زمین پر قبضہ کر لیا ہے، اور 20 ہندوستانی فوجی شہید ہو گئے۔ اس بیان پر سپریم کورٹ نے سخت تبصرہ کیا اور کہا، "اگر آپ سچے ہندوستانی ہیں، تو آپ ایسا نہیں کہیں گے۔ اس تبصرے سے راہل گاندھی کی ساکھ پر سوال اٹھتے ہیں۔

راہل گاندھی کی ذہنیت ملک دشمن ہے: گورو بھاٹیہ

گورو بھاٹیہ نے کہا کہ یہ پہلی بار نہیں ہے جب راہل گاندھی نے ایسی مسخ شدہ اور ملک مخالف ذہنیت کا مظاہرہ کیا ہو۔ انہوں نے کہا کہ جب ویر ساورکر جی کے بارے میں متنازع بیان دیا گیا، تب بھی راہل گاندھی کی سوچ سامنے آئی تھی۔ ان پر ہتک عزت کا مقدمہ بھی چل رہا ہے۔

راہل گاندھی کی سپریم کورٹ نے سرزنش کی: دھرمیندر پردھان

مرکزی وزیر دھرمیندر پردھان نے کہا کہ سپریم کورٹ نے راہل گاندھی کو فوج اور قومی سلامتی پر دیے گئے غیر ذمہ دارانہ بیانات پر سخت تنقید کا نشانہ بنایا ہے۔ چین کے ذریعہ 2000 کلومیٹر زمین پر قبضہ کرنے کے جھوٹے دعوے پر عدالت نے سوال کیا کہ کیا آپ وہاں تھے؟ کیا آپ کے پاس کوئی ثبوت ہے؟ صرف اپوزیشن لیڈر ہونا اس بات کی اجازت نہیں دیتا کہ آپ کچھ بھی کہہ دیں۔

ان کی وفاداری قوم سے نہیں، صرف خاندان سے ہے: دھرمیندر پردھان

انہوں نے مزید کہا کہ ہندوستان کے پارلیمانی تاریخ میں یہ پہلا موقع ہے جب سپریم کورٹ کو کسی اپوزیشن لیڈر پر اتنا سخت تبصرہ کرنا پڑا ہے۔ چاہے وہ سرجیکل اسٹرائیک ہو یا آپریشن سندور، راہل گاندھی اور کانگریس نے ہر موقع پر ہندوستانی فوج کی قربانیوں پر سوال اٹھائے ہیں۔ ان کی وفاداری قوم سے نہیں، بلکہ صرف اپنے خاندان سے ہے۔ یہی وجہ ہے کہ ان کے اندر قوم کے لیے احترام کی کمی ہے۔ آج پورا ملک ان کے اس ملک دشمن رویے سے مجروح ہے اور ان سے معافی کی توقع رکھتا ہے۔

راہل گاندھی ہمیشہ ہندوستان کے خلاف بولتے ہیں:  کنگنا رناوت

بی جے پی رکن پارلیمنٹ اور اداکارہ کنگنا رناوت نے بھی راہل گاندھی پر سخت حملہ کرتے ہوئے کہا کہ راہل ہمیشہ ہندوستان کے خلاف بولتے ہیں، چاہے وہ معیشت کا معاملہ ہو یا دفاعی معاملات کا۔ وہ دشمن ملکوں کے حق میں بات کرتے ہیں۔ ان کے اندر ہندوستان مخالف ذہنیت ہے۔ سپریم کورٹ نے جو سرزنش کی ہے، وہ قابل ستائش ہے۔ انہوں نے کہا کہ آئندہ سب کو خیال رکھنا چاہیے کہ وہ ملک کی عزت، سالمیت اور حوصلے کو ٹھیس نہ پہنچائیں۔

سپریم کورٹ کے جج نے کیا کہا؟

سپریم کورٹ کے جج دیپانکر دتہ نے "بھارت جوڑو یاترا" کے دوران راہل گاندھی کے بیان پر سخت تبصرہ کرتے ہوئے کہا کہ ایک سچا ہندوستانی ایسا بیان نہیں دے گا۔ آپ کو کیسے معلوم ہوا کہ چین نے 2000 مربع کلومیٹر زمین پر قبضہ کیا ہے؟ آپ نے یہ بات کس مستند دستاویز کی بنیاد پر کہی؟

انہوں نے مزید کہا کہ جب سرحد پر تنازع ہو، تب کیا آپ کو ایسا بیان دینا چاہیے؟

یہ پورا معاملہ ایک بار پھر راہل گاندھی کے بیانات اور ملک کے تئیں ان کے رویے کو لے کر سوالات کھڑے کر رہا ہے