نئی دہلی

کانگریس رہنما راہل گاندھی نے ہفتہ کے روز اتر پردیش کے غازی پور میں مبینہ عصمت دری اور قتل کے معاملے پر ردِعمل دیتے ہوئے ریاستی حکومت پر سخت حملہ کیا۔ انہوں نے خواتین کے خلاف جرائم کے ایک تسلسل اور انصاف فراہم کرنے میں ناکامی کا الزام عائد کیا۔ایکس پر اپنی پوسٹ میں انہوں نے لکھا، "اتر پردیش کے غازی پور میں وشوکرما برادری کی ایک بیٹی کے ساتھ عصمت دری کے بعد بے دردی سے قتل اور پھر خاندان کو ایف آئی آر درج کرانے سے روکنے کے لیے دھمکیاں اور تشدد۔

انہوں نے ماضی کے کئی واقعات کا حوالہ دیتے ہوئے کہا، "ہاتھرس، کٹھوعہ، اناؤ اور اب غازی پور یہ ایک پیٹرن ہے۔ منی پور کی بیٹی انصاف کا انتظار کرتے ہوئے دم توڑ گئی۔

نظام میں تعصب کا الزام لگاتے ہوئے انہوں نے کہا کہ ہر بار ایک ہی چہرہمتاثرہ دلت، پسماندہ، قبائلی یا غریب ہوتی ہے۔ ہر بار ایک ہی حقیقت—مجرم کو تحفظ اور متاثرہ کو اذیت۔ ہر بار ایک ہی خاموشی اقتدار میں بیٹھے لوگ، جنہیں بولنا چاہیے تھا، خاموش رہتے ہیں۔حکمرانی پر سوال اٹھاتے ہوئے انہوں نے کہا، "جس ملک اور ریاست میں والدین کو اپنی بیٹی کے لیے ایف آئی آر درج کرانے کے لیے بھی منتیں کرنی پڑیں، اس حکومت کو اقتدار میں رہنے کا کوئی اخلاقی حق نہیں۔

راہل گاندھی نے سخت کارروائی اور تحقیقات کا مطالبہ کرتے ہوئے کہا کہ قصوروار پولیس افسران کے خلاف کارروائی ہو، خاندان کو تحفظ دیا جائے، اعلیٰ سطح کی جانچ ہو اور فوری انصاف فراہم کیا جائے۔وزیر اعظم نریندر مودی اور اتر پردیش کے وزیر اعلیٰ کو مخاطب کرتے ہوئے انہوں نے کہا کہ مودی جی، وزیر اعلیٰ صاحب، جواب دیں—آپ کے دور میں بیٹیاں اتنی غیر محفوظ کیوں ہیں؟

اپنی پوسٹ کے اختتام پر انہوں نے کہا کہ ایسے حالات میں انصاف مانگا نہیں جاتا—چھینا جاتا ہے، اور ہم اسے چھین کر رہیں گے۔کانگریس کی جنرل سیکریٹری پریانکا گاندھی واڈرا نے بھی خواتین کے خلاف بڑھتے جرائم پر وزیر اعظم نریندر مودی کو نشانہ بناتے ہوئے کہا کہ خواتین کے بارے میں ان کے بڑے بیانات محض دکھاوا ہیں۔انہوں نے غازی پور میں ایک نابالغ لڑکی کی موت کے حالیہ واقعے کا حوالہ دیتے ہوئے الزام لگایا کہ جہاں بھی خواتین کے ساتھ ناانصافی ہوتی ہے، بی جے پی اپنی پوری طاقت کے ساتھ متاثرہ کے خلاف کھڑی ہو جاتی ہے۔

اطلاعات کے مطابق، غازی پور کے ایک گاؤں سے 14 اپریل کو لاپتہ ہونے والی ایک نابالغ لڑکی کی لاش 15 اپریل کو دریائے گنگا کے پل کے قریب ملی۔پرینکا گاندھی نے ایکس پر لکھا، "غازی پور میں ایک لڑکی کے قتل کے معاملے میں مقدمہ درج کرنے میں ہچکچاہٹ، متاثرہ خاندان کو دھمکیاں اور بااثر لوگوں کی جانب سے ہنگامہ—یہ سب ظاہر کرتا ہے کہ ریاست میں خواتین کے خلاف جرائم عروج پر ہیں۔ بی جے پی کے دور میں یہ ایک ان کہی حقیقت بن چکی ہے کہ جہاں بھی کسی عورت پر ظلم ہوتا ہے، متاثرہ کو ہی مزید ستایا جاتا ہے۔

انہوں نے وزیر اعظم کو تنقید کا نشانہ بناتے ہوئے کہا کہ خواتین کی حفاظت سے متعلق وزیر اعظم کے بڑے بیانات صرف دکھاوا ہیں۔ اناؤ، ہاتھرس، پریاگ راج یا غازی پور—جہاں بھی خواتین کے ساتھ ناانصافی ہوئی، بی جے پی نے اپنی پوری طاقت کے ساتھ ظالم کا ساتھ دیا۔ ملک بھر کی خواتین اس اندھیرے دور کو دیکھ رہی ہیں۔

دوسری جانب پولیس نے مرکزی ملزم کو گرفتار کر لیا ہے اور واقعے کی تفصیلی تحقیقات شروع کر دی ہیں۔وارانسی زون کے ایڈیشنل ڈائریکٹر جنرل پولیس پیوش مورڈیا نے صحافیوں سے بات کرتے ہوئے کہا، "14 اور 15 اپریل کی درمیانی رات کو غازی پور کے کٹیریا گاؤں سے ایک بچی لاپتہ ہوئی تھی۔ اگلی صبح تقریباً 5:30 بجے اس کی لاش دریائے گنگا کے پل کے قریب ملی۔

پولیس کے مطابق، اہلِ خانہ کی فراہم کردہ معلومات کی بنیاد پر ایف آئی آر درج کی گئی اور مرکزی ملزم کو گرفتار کر لیا گیا ہے، جبکہ مزید تحقیقات جاری ہیں۔