رائے بریلی/ آواز دی وائس
لوک سبھا میں اپوزیشن کے لیڈر اور کانگریس کے ممبر پارلیمنٹ راہل گاندھی بدھ کو اپنے پارلیمانی انتخابی حلقے کے دو روزہ دورے پر رائے بریلی پہنچیں گے۔ اس دوران وہ کئی پروگراموں میں شریک ہوں گے اور ترقیاتی کاموں کا جائزہ لیں گے۔
کانگریس کے ضلعی صدر پنکج تیواری نے بتایا کہ راہل اپنے رائے بریلی دورے کے پہلے دن سب سے پہلے ہرچند پور میں پارٹی کے سابق عہدیداروں کے ساتھ ایک میٹنگ کریں گے۔ انہوں نے بتایا کہ اس کے بعد گاندھی، گورا بازار چوراہے پر اشوک ستون کی نقاب کشائی کرنے سے پہلے شہر کے ایک ہوٹل میں پراجاپتی برادری کے افراد سے گفتگو کریں گے۔
تیواری نے بتایا کہ مہاتما گاندھی نیشنل رورل ایمپلائمنٹ گارنٹی یوجنا کے تحت بنے ایک پارک کا معائنہ کرنے کے لیے راہل گاندھی مولیہامؤ گاؤں جائیں گے۔ تیواری نے مزید کہا کہ اس کے بعد وہ اونچاہار اسمبلی حلقے کے بوتھ سطح کے کارکنوں سے بات چیت کریں گے۔ بتایا گیا کہ رکنِ پارلیمنٹ اونچاہار واقع این ٹی پی سی گیسٹ ہاؤس میں رات گزاریں گے۔
انہوں نے کہا کہ اپنے دورے کے دوسرے دن جمعرات کو راہل گاندھی پارٹی رہنماؤں اور مختلف تنظیموں کے نمائندوں سے ملاقات کریں گے، جس کے بعد وہ کلیکٹریٹ واقع بچت بھون میں ضلعی نگرانی و احتیاطی کمیٹی کی ایک میٹنگ میں شریک ہوں گے۔
