بھوپال:کانگریس کے سابق قومی صدر اور رکن پارلیمنٹ راہل گاندھی کی بگڑتی ہوئی صحت کی وجہ سے مدھیہ پردیش کے ستنا اور جھارکھنڈ میں رانچی کا ان کا دورہ منسوخ کر دیا گیا ہے۔ ان کی جگہ پارٹی کے قومی صدر ملکارجن کھرگے ستنا جائیں گے۔

کانگریس کی مدھیہ پردیش یونٹ کے صدر جیتو پٹواری نے ٹویٹر پر لکھا، راہل گاندھی خرابی صحت کی وجہ سے آج ستنا نہیں آسکتے ہیں۔ ایسے میں انہوں نے کانگریس صدر ملکارجن کھرگے سے ستنا جانے کی درخواست کی۔جیتو پٹواری نے مزید لکھا ہے کہ پارٹی کے قومی صدر نے کانگریس کے لوک سبھا امیدوار سدھارتھ کشواہا کی حمایت میں ستنا میں ہونے والی میٹنگ میں اپنی موجودگی کو یقینی بنایا ہے۔پارٹی کے ریاستی صدر پٹواری نے بتایا ہے کہ راہل گاندھی کے جلد ہی ریاست میں پروگرام ہوں گے اور وہ عوام سے ملاقات کریں گے۔ قابل ذکر ہے کہ راہل گاندھی اتوار کو مدھیہ پردیش کے ستنا میں کانگریس امیدوار کی حمایت میں جلسہ کرنے والے تھے۔