سلطان پور
کانگریس رہنما راہل گاندھی آج جمعہ کو سخت سکیورٹی کے درمیان سلطان پور ڈسٹرکٹ کورٹ میں پیش ہوئے اور وزیرِ داخلہ امت شاہ کے خلاف تبصرے سے متعلق ہتکِ عزت کے مقدمے میں سی آر پی سی کی دفعہ 313 کے تحت اپنا بیان درج کرایا۔ اس معاملے کی اگلی سماعت اب 9 مارچ کو ہوگی۔ بیان درج کرانے کے بعد لوک سبھا میں قائدِ حزبِ اختلاف راہل گاندھی اپنی پارٹی کے کئی رہنماؤں کے ساتھ لکھنؤ روانہ ہو گئے۔
بیان درج کرانے کے لیے راہل صبح تقریباً 11 بجے عدالت میں حاضر ہوئے اور قریب آدھا گھنٹہ وہاں موجود رہے۔ اس دوران انہوں نے ہتکِ عزت کے مقدمے میں اپنا بیان ریکارڈ کرایا۔ راہل کے وکیل کاشی پرساد شکلا کے مطابق، راہل نے الزامات کو بے بنیاد قرار دیتے ہوئے کہا کہ یہ مقدمہ سیاسی محرکات پر مبنی ہے۔ کاشی پرساد شکلا کے مطابق، راہل نے عدالت میں کہا كہ میں پورے معاملے میں بے قصور ہوں۔ مجھ پر لگائے گئے الزامات سیاسی ہیں۔
عدالت نے شواہد پیش کرنے کے لیے 9 مارچ تک کا وقت دیا ہے۔ اس کے بعد راہل پارٹی کے ریاستی صدر اجے رائے اور راجیہ سبھا کے رکن پرومود تیواری کے ساتھ لکھنؤ روانہ ہو گئے۔ اس سے قبل گزشتہ ماہ 19 جنوری کو راہل سلطان پور میں ایم پی-ایم ایل اے کورٹ کی سماعت کے دوران پیش نہیں ہو سکے تھے، جس کے بعد عدالت نے اگلی تاریخ 20 فروری مقرر کی تھی۔
ہتکِ عزت کا مقدمہ کس نے درج کرایا
ہتکِ عزت سے متعلق یہ معاملہ اکتوبر 2018 کا ہے۔ اس وقت سلطان پور ضلع کے ہنومان گنج علاقے سے بی جے پی کے مقامی رہنما وجے مشرا نے راہل گاندھی کے خلاف عدالت میں مقدمہ درج کرایا تھا۔ وجے مشرا کا الزام ہے کہ اگست 2018 میں کرناٹک میں ایک انتخابی مہم کے دوران راہل نے امت شاہ کے بارے میں نازیبا اور غلط باتیں کہیں، جو اس وقت بھارتیہ جنتا پارٹی کے قومی صدر تھے۔
شکایت کنندہ نے کانگریس رہنما کے اس بیان کا حوالہ دیا جس میں کہا گیا تھا کہ بی جے پی ایماندار اور شفاف سیاست کا وعدہ کرتی ہے، جبکہ اس کی قیادت ایسے پارٹی صدر کے ہاتھ میں ہے جو قتل کے ایک مقدمے میں ملزم ہیں۔ تاہم فروری 2024 میں سلطان پور کی عدالت نے اس مقدمے میں راہل گاندھی کو ضمانت دے دی تھی۔
سلطان پور سے لکھنؤ اور پھر دہلی واپسی
اس سے پہلے آج صبح لوک سبھا میں قائدِ حزبِ اختلاف راہل گاندھی سخت سکیورٹی کے درمیان لکھنؤ ایئرپورٹ سے سلطان پور ڈسٹرکٹ کورٹ کے لیے روانہ ہوئے تھے۔ پارٹی رہنماؤں کے مطابق وہ صبح تقریباً 11 بجے سول کورٹ پہنچے۔ اتر پردیش میں کانگریس کے ریاستی صدر اجے رائے نے کہا كہ انہیں سلطان پور کورٹ جانا ہے۔ آج تاریخ ہے اور وہ خود عدالت میں پیش ہوں گے۔ پارٹی کارکنان سمیت کئی لوگ آ رہے ہیں اور ان سے ملاقات کریں گے۔
وہیں پارٹی کے ایک اور رہنما اکھلیش پرتاپ سنگھ نے راہل کے سفر کے بارے میں بتایا كہ راہل گاندھی دہلی ایئرپورٹ سے لکھنؤ آ رہے ہیں۔ یہاں سے وہ ایک مقدمے میں پیش ہونے اور عدالتی کارروائی میں حصہ لینے کے لیے سلطان پور کورٹ جائیں گے۔ اس کے بعد وہ لکھنؤ واپس آئیں گے اور پھر دہلی لوٹ جائیں گے۔
.webp "ہتک عزت کیس: راہل گاندھی نے بیان ریکارڈ کرایا")
.gif)
