نئی دہلی/ آواز دی وائس
اُنّاؤ ریپ کیس میں کلدیپ سنگھ سینگر کو ضمانت ملنے پر راہل گاندھی سخت برہم ہو گئے ہیں۔ انہوں نے کہا کہ ایک مجرم کو ضمانت ملنا شرمناک اور مایوس کن ہے۔ راہل گاندھی نے یہ بھی کہا کہ جب متاثرہ خاتون خوف کے سائے میں زندگی گزار رہی ہو تو ایسے میں ضمانت دیا جانا اور بھی زیادہ شرمناک ہے۔
راہل گاندھی نے کہا کہ متاثرہ کو بار بار ہراساں کیا جا رہا ہے۔ انہوں نے سوال اٹھایا کہ ریپسٹوں کو ضمانت دینا کیسا انصاف ہے؟ کیا اجتماعی زیادتی کی شکار خاتون کے ساتھ ایسا سلوک مناسب ہے؟ کیا انصاف کے لیے آواز اٹھانا اس کی غلطی ہے؟
دہلی ہائی کورٹ نے سینگر کو ضمانت دی
دہلی ہائی کورٹ نے کل، یعنی 23 دسمبر کو سابق بی جے پی ایم ایل اے کلدیپ سنگھ سینگر کو راحت دی تھی۔ عدالت نے کچھ شرائط کے ساتھ سینگر کو ضمانت منظور کی اور ان کی عمر قید کی سزا پر بھی روک لگا دی۔ جسٹس سبرامنیم پرساد اور جسٹس ہریش ویدیہ ناتھن شنکر پر مشتمل ڈویژن بنچ نے یہ فیصلہ سنایا۔ نچلی عدالت نے سال 2019 میں سینگر کو عمر قید کی سزا سنائی تھی۔
عدالت نے اپنے فیصلے میں کہا تھا کہ سینگر کو 15 لاکھ روپے کا ذاتی مچلکہ جمع کرنا ہوگا اور اتنی ہی رقم کے تین ضمانت دار پیش کرنے ہوں گے۔ اس کے ساتھ ہی عدالت نے کچھ مزید شرائط بھی عائد کیں۔ اس معاملے کی اگلی سماعت 15 جنوری 2026 کو ہوگی۔ اُنّاؤ ریپ کیس کا تعلق سال 2017 سے ہے، جبکہ اپریل 2018 میں سینگر کو گرفتار کیا گیا تھا۔
متاثرہ سپریم کورٹ سے رجوع کرے گی
اُنّاؤ ریپ کیس کی متاثرہ خاتون نے کلدیپ سنگھ سینگر کی سزا معطل کیے جانے کے فیصلے کے خلاف سپریم کورٹ جانے کا اعلان کیا ہے۔ متاثرہ نے کہا کہ سینگر کی سزا پر روک ان کے خاندان کے لیے موت کے مترادف ہے اور وہ اس فیصلے کو سپریم کورٹ میں چیلنج کرے گی۔
.webp "کلدیپ سنگھ سینگر کی ضمانت پر راہل گاندھی ناراض")
