نئی دہلی/ آواز دی وائس

ملک کے کئی حصوں میں آئی خوفناک سیلابی صورتحال پر کانگریس لیڈر راہل گاندھی نے بدھ کے روز وزیراعظم نریندر مودی سے خصوصی ریلیف پیکیج کا اعلان کرنے کی اپیل کی۔ کانگریس لیڈر گاندھی نے ایکس پر ایک پوسٹ شیئر کرتے ہوئے کہا کہ پنجاب، ہماچل پردیش، جموں و کشمیر اور اتراکھنڈ میں سیلاب کی صورتحال نہایت تشویشناک ہے۔

مرکزی حکومت سے مدد مانگتے ہوئے گاندھی نے کہا کہ مودی جی، پنجاب میں سیلاب نے بھیانک تباہی مچائی ہے۔ جموں و کشمیر، ہماچل اور اتراکھنڈ میں بھی حالات انتہائی تشویشناک ہیں۔ ایسے مشکل وقت میں آپ (وزیراعظم مودی) کی توجہ اور مرکزی حکومت کی فعال مدد بے حد ضروری ہے۔ ہزاروں خاندان اپنے گھر، جان اور پیاروں کو بچانے کے لیے جدوجہد کر رہے ہیں۔

گاندھی نے اپنی پوسٹ میں مزید کہا کہ میں گزارش کرتا ہوں کہ ان ریاستوں، خاص طور پر کسانوں کے لیے ایک خصوصی ریلیف پیکیج کا فوراً اعلان کیا جائے اور راحت و بچاؤ کے کاموں میں تیزی لائی جائے۔ ادھر، ملک کی کئی ریاستوں میں بھاری بارش کے درمیان ہندوستانی محکمہ موسمیات (آئی ایم ڈی) نے جموں و کشمیر، لداخ، ہماچل پردیش، شمالی پنجاب، شمالی ہریانہ، مشرقی راجستھان، جنوب مغربی اترپردیش، شمال مغربی اور مشرقی مدھیہ پردیش اور اڑیسہ کے کئی اضلاع کے لیے ریڈ الرٹ جاری کیا ہے۔

آئی ایم ڈی کے مطابق، جموں و کشمیر میں ریڈ الرٹ والے اضلاع میں پونچھ، میرپور، راجوری، ریاسی، جموں، رامبن، ادھمپور، سانبہ، کٹھوعہ، ڈوڈہ اور کشتواڑ شامل ہیں۔ پنجاب میں کپور تھلا، جالندھر، نواشہر، روپ نگر، موگا، لدھیانہ، برنالا اور سنگرور ریڈ الرٹ پر ہیں، جبکہ ہماچل پردیش میں منڈی، اونا، بیلاس پور، سرمور اور سولن میں بھی یہی انتباہ دیا گیا ہے۔ ہریانہ کے یمنا نگر، امبالہ، کوروکشتر، پنچکلا اور ایس اے ایس نگر بھی اسی وارننگ کے تحت ہیں۔

منگل صبح 8:30 بجے سے بدھ صبح 5:30 بجے کے درمیان جموں و کشمیر کے کئی علاقوں میں شدید بارش ریکارڈ کی گئی۔ سب سے زیادہ بارش ریاسی میں 203 ملی میٹر رہی، اس کے بعد کٹرا میں 193 ملی میٹر، بٹوٹے میں 157.3 ملی میٹر، ڈوڈہ میں 114 ملی میٹر اور بدرواہ میں 96.2 ملی میٹر بارش ہوئی۔ جموں شہر میں 81 ملی میٹر بارش ہوئی، جبکہ بانہال (95 ملی میٹر)، رامبن (82 ملی میٹر)، کوکرناگ (68.2 ملی میٹر) اور پہلگام (55 ملی میٹر) میں بھی بھاری بارش ریکارڈ کی گئی۔

اس کے علاوہ، اسی مدت میں سرینگر (32 ملی میٹر)، سانبہ (48 ملی میٹر)، کشتواڑ (50 ملی میٹر)، راجوری (57.4 ملی میٹر) اور قاضی گنڈ (68 ملی میٹر) میں بھی بارش ریکارڈ کی گئی۔

۔3 ستمبر صبح 6:45 بجے تک کے تازہ اعداد و شمار کے مطابق، جموں و کشمیر کے ریاسی میں 230.5 ملی میٹر کے ساتھ انتہائی بھاری بارش درج ہوئی۔ جموں و کشمیر کے علاوہ کئی دیگر ریاستوں میں بھی غیر معمولی بارش دیکھی گئی۔

منگل رات 8:30 بجے سے بدھ صبح 5:30 بجے تک چھتیس گڑھ میں بھاری بارش ریکارڈ کی گئی، جبکہ ہریانہ، اتراکھنڈ، دہلی، اتر پردیش، مدھیہ پردیش، بہار، مغربی بنگال، ساحلی اڑیسہ، ساحلی مہاراشٹر، ساحلی کرناٹک اور انڈمان جزائر کے کچھ حصوں میں درمیانی بارش ہوئی۔

اس سے پہلے آج، دہلی میں جمنا ندی کا پانی خطرے کے نشان کو پار کر گیا۔ شہر کے لیے وارننگ کا نشان 204.5 میٹر ہے، جبکہ خطرے کا نشان 205.33 میٹر ہے۔ لوگوں کو 206 میٹر پر محفوظ مقامات پر منتقل کیا جا رہا ہے۔ پچھلے کچھ دنوں سے دہلی میں لگاتار بھاری بارش کے سبب پانی کی سطح بڑھ رہی ہے۔ ممکنہ سیلاب کی صورتحال کے پیش نظر احتیاطی اقدام کے طور پر آس پاس کے نچلے علاقوں میں رہنے والے لوگوں کو مایور وہار فیز-1 میں منتقل کیا گیا ہے۔