جالندھر:پنجاب کے جالندھر میں عام آدمی پارٹی (اے اے پی) کے رکن اسمبلی رمن اروڑا کو پولیس نے گرفتار کر لیا ہے۔ یہ گرفتاری جبری وصولی کے ایک معاملے میں کی گئی ہے۔ اب پولیس رکن اسمبلی رمن اروڑا کو عدالت میں لے گئی ہے۔ رمن اروڑا کو ایک دن پہلے ہی پنجاب-ہریانہ ہائی کورٹ سے بدعنوانی کے کیس میں ضمانت ملی تھی۔
وِجیلنس بیورو نے ان کے خلاف مقدمہ درج کیا تھا، حالانکہ عدالت میں انہیں اس کیس میں راحت مل گئی تھی۔ مگر اس کے اگلے ہی دن راما منڈی پولیس نے انہیں دوسرے معاملے میں گرفتار کر لیا۔ نابھا جیل سے باہر آنے کے بعد پولیس نے انہیں ایک اور جبری وصولی کے کیس میں گرفتار کرکے عدالت میں پیش کیا۔ اس سلسلے میں ایک نجی ادارے نے 30 اگست کو ایف آئی آر درج کرائی تھی۔ رکن اسمبلی کو 23 مئی کو گرفتار کیا گیا تھا۔
ان کے ساتھ میونسپل کارپوریشن کے اسسٹنٹ ٹاؤن پلانر سکھدیپ سنگھ اور انسپکٹر ہرپریت کور سمیت دیگر افسران کو بھی بدعنوانی کے معاملے میں پکڑا گیا تھا۔ وِجیلنس بیورو ان کے بیٹے کے خلاف بھی مقدمہ درج کر چکا ہے، تاہم اسے عدالت سے عبوری ضمانت مل گئی ہے۔ اے اے پی رکن اسمبلی رمن اروڑا اور اے ٹی پی سکھدیپ وِشِشت کی ضمانت کی عرضی ہائی کورٹ میں لگی تھی اور دونوں کو ایک ساتھ ضمانت مل گئی۔
عدالت نے رمن اروڑا اور سکھدیپ وِشِشت کو مستقل طور پر ضمانت دے دی ہے۔ وہیں، فی الحال راجو مدان کی ضمانت پر عدالت بعد میں فیصلہ سنائے گی۔ رمن اروڑا پنجاب کی جالندھر سینٹرل سیٹ سے عام آدمی پارٹی کے رکن اسمبلی ہیں۔ 54 سالہ رمن اروڑا کو بدعنوانی کے الزام میں گرفتار کیا گیا تھا۔ الزام تھا کہ انہوں نے جعلی نوٹس جاری کرکے بڑے پیمانے پر لوگوں سے پیسے وصولے۔
عام آدمی پارٹی نے جالندھر سینٹرل کے رکن اسمبلی رمن اروڑا کی گرفتاری کے بعد بدعنوانی کے خلاف زیرو ٹالرنس کا دعویٰ کیا تھا۔ پارٹی کی جانب سے کہا گیا تھا کہ کوئی بھی قانون سے بالاتر نہیں ہے، یہاں تک کہ عام آدمی پارٹی کے اندر بھی کوئی قانون سے بالاتر نہیں۔
