نئی دہلی: دہلی ہائی کورٹ کے جج جسٹس تیجس کاریا نے بدھ کے روز اس مفادِ عامہ کی عرضی (پی آئی ایل) کی سماعت سے خود کو الگ کر لیا، جس میں عام آدمی پارٹی (آپ) کے رہنماؤں اروند کیجریوال، منیش سسودیا اور دیگر کے خلاف عدالت کی کارروائی کے ویڈیو کلپس مبینہ طور پر اپ لوڈ اور شیئر کرنے پر توہینِ عدالت کی کارروائی کی درخواست کی گئی تھی۔

ان رہنماؤں پر الزام ہے کہ انہوں نے جسٹس سورنکانتا شرما کو آبکاری پالیسی کیس کی سماعت سے الگ کرنے کی درخواست سے متعلق سابق وزیر اعلیٰ کیجریوال کی عرضی پر ہونے والی عدالتی سماعت کے ویڈیوز اپ لوڈ اور شیئر کیے تھے۔ وکیل ویبھو سنگھ کی جانب سے دائر اس مفادِ عامہ کی عرضی کو چیف جسٹس ڈی کے اپادھیائے اور جسٹس کاریا کی بنچ کے سامنے سماعت کے لیے پیش کیا گیا تھا۔

بنچ نے ہدایت دی کہ اس معاملے کو جمعرات کو کسی دوسری بنچ کے سامنے پیش کیا جائے۔ عدالت نے کہا، “اس معاملے کی سماعت یہ بنچ نہیں کرے گی۔ اسے کل ایسی بنچ کے سامنے پیش کیا جائے جس میں ہم میں سے ایک، جسٹس تیجس کاریا، شامل نہ ہوں۔” درخواست گزار کے وکیل نے گزارش کی کہ معاملہ ایسی دوسری بنچ کو منتقل کیا جائے جو اسی نوعیت کے مسئلے پر پہلے سے سماعت کر رہی ہے۔

‘آپ’ رہنماؤں کے علاوہ اس عرضی میں ہائی کورٹ انتظامیہ اور سوشل میڈیا کمپنیاں میٹا پلیٹ فارمز، ایکس اور گوگل کو بھی فریق بنایا گیا ہے۔ جسٹس کاریا جج بننے سے قبل ایک معروف قانونی مشاورتی کمپنی میں پارٹنر رہ چکے ہیں اور کئی مقدمات میں میٹا کی جانب سے پیش ہو چکے ہیں۔

درخواست گزار سنگھ نے اپنی عرضی میں کہا کہ عدالت کی ریکارڈنگ کو بغیر اجازت سوشل میڈیا پر شیئر کرنا عدلیہ کی آزادی کو کمزور کر سکتا ہے اور یہ ہائی کورٹ کے قواعد کے تحت بھی ممنوع ہے۔ عرضی میں دعویٰ کیا گیا کہ عام آدمی پارٹی کے کئی رہنماؤں اور کانگریس لیڈر دگ وجے سنگھ سمیت دیگر اپوزیشن ارکان نے 13 اپریل کو جسٹس سورنکانتا شرما کے سامنے کیجریوال کی پیشی کے ویڈیو کو “جان بوجھ کر ریکارڈ کر کے سوشل میڈیا پر نشر” کیا تاکہ عوام کی نظر میں عدالت کی شبیہ کو نقصان پہنچایا جا سکے۔

عرضی میں الزام لگایا گیا کہ کیجریوال اور ان کی پارٹی کے ارکان نے عدالت کی کارروائی ریکارڈ کرنے کے لیے “سازش” اور “گندی حکمتِ عملی” اختیار کی۔ اس میں مطالبہ کیا گیا ہے کہ معاملے کی تحقیقات کے لیے ایس آئی ٹی تشکیل دی جائے اور 13 اپریل 2026 کی عدالتی کارروائی کی ریکارڈنگ کو ‘اپ لوڈ، ری پوسٹ یا فارورڈ’ کرنے والے تمام افراد کے خلاف توہینِ عدالت کی کارروائی شروع کی جائے۔ عرضی میں متعلقہ مواد کو سوشل میڈیا سے ہٹانے کی بھی درخواست کی گئی ہے۔ سنگھ نے 15 اپریل کو عدالت کی مبینہ غیر مجاز ریکارڈنگ کے خلاف ہائی کورٹ کے رجسٹرار جنرل سے شکایت بھی کی تھی۔

پیر کے روز جسٹس سورنکانتا شرما نے آبکاری پالیسی کیس کی سماعت سے خود کو الگ کرنے سے انکار کر دیا تھا۔ انہوں نے کہا تھا کہ کسی بھی فریق کو بغیر ثبوت کے جج پر فیصلہ کرنے کی اجازت نہیں دی جا سکتی اور جج کسی فریق کے بے بنیاد خدشات کی بنیاد پر خود کو مقدمے سے الگ نہیں کر سکتے۔