نئی دہلی: عام آدمی پارٹی کے قومی کنوینر اروند کیجریوال نے کہا ہے کہ ای 20 پٹرول کے خلاف ان کی پارٹی کا احتجاج جاری رہے گا اور عوام سے اپیل کی کہ اگر وہ اس پالیسی کو نافذ ہونے سے روکنا چاہتے ہیں تو بڑی تعداد میں اس تحریک کا حصہ بنیں۔

منگل کو کیجریوال اور عام آدمی پارٹی کے دیگر رہنماؤں نے 2.30 لاکھ سے زائد یادداشتیں (میمورنڈم) وزیر اعظم نریندر مودی کی رہائش گاہ تک پہنچانے کے لیے تقریباً 100 افراد کے ساتھ مارچ نکالا، تاہم دہلی پولیس نے انہیں فیروز شاہ روڈ پر ہی روک دیا۔ پولیس کی کارروائی کے بعد کیجریوال، سابق نائب وزیر اعلیٰ منیش سسودیا، جیسمین شاہ اور دیگر پارٹی رہنماؤں کے ساتھ وہیں دھرنے پر بیٹھ گئے۔

بعد ازاں پریس کانفرنس سے خطاب کرتے ہوئے کیجریوال نے کہا کہ جن ریاستوں میں عام آدمی پارٹی کے ارکان اسمبلی موجود ہیں، وہاں بھی اس پالیسی کی مخالفت کی جائے گی۔ انہوں نے کہا، "گوا اور گجرات میں بھی ہمارے ایم ایل اے ہیں اور ہم وہاں بھی ای 20 پالیسی کو منظور نہیں ہونے دیں گے۔ ہمارے ارکان اسمبلی ایوان میں اس کی مخالفت کریں گے۔"

کیجریوال نے کہا کہ اگرچہ آج کے احتجاج میں صرف تقریباً 100 افراد شریک ہوئے، لیکن ان لوگوں نے سوشل میڈیا پر تنقید اور ٹرولنگ کے باوجود ہمت کا مظاہرہ کیا۔ انہوں نے عوام سے اپیل کرتے ہوئے کہا، "اگر لوگ ای 20 سے نجات چاہتے ہیں تو انہیں بڑی تعداد میں سڑکوں پر نکلنا ہوگا۔"

عام آدمی پارٹی کے رکن پارلیمنٹ سنجے سنگھ نے دعویٰ کیا کہ انہوں نے پارلیمنٹ میں یہ معاملہ اٹھایا تھا اور حکومت کے جواب سے واضح ہو گیا ہے کہ مرکز ای 20 پالیسی کو نافذ کرنے کے لیے پُرعزم ہے۔ سنجے سنگھ نے الزام لگایا کہ ایتھنول کی پیداوار سے ہندوستانی کسانوں کو فائدہ نہیں ہوگا، بلکہ اس پالیسی سے امریکی کسانوں کو فائدہ پہنچے گا۔ کیجریوال نے وزیر اعظم نریندر مودی سے مطالبہ کیا کہ وہ امریکی صدر ڈونلڈ ٹرمپ کے مبینہ دباؤ کا مقابلہ کریں اور امریکہ سے ایتھنول کی درآمد روکیں۔ ان کا الزام تھا کہ یہ پالیسی ہندوستانی کسانوں کے بجائے غیر ملکی مفادات کو ترجیح دیتی ہے۔