کٹیہار(بہار): کانگریس کی جنرل سکریٹری پرینکا گاندھی نے بہار کے کٹیہار میں منعقد اپنی انتخابی ریلی میں وزیرِاعظم نریندر مودی اور مرکزی حکومت پر شدید حملہ کیا۔ انہوں نے کہا کہ آج کانگریس وہی جدوجہد کر رہی ہے جو مہاتما گاندھی نے کبھی ناانصافی اور تقسیم کی پالیسیوں کے خلاف لڑی تھی۔

پرینکا گاندھی نے الزام لگایا کہ وزیرِاعظم مودی ملک کے تمام سرکاری ادارے (PSUs) اپنے چند کارپوریٹ دوستوں کے حوالے کر رہے ہیں، جس سے عام عوام کو نقصان ہو رہا ہے۔ انہوں نے کہا، “وزیرِاعظم عوام کی ملکیت کو چند منتخب صنعت کاروں کے حوالے کر رہے ہیں، جبکہ ملک کے عام لوگ اس کا خمیازہ بھگت رہے ہیں۔”

وزیرِاعظم کے حالیہ بیانات پر ردِعمل ظاہر کرتے ہوئے پرینکا گاندھی نے کہا کہ نریندر مودی اپنے عہدے کی وقار کو برقرار رکھنے میں ناکام رہے ہیں۔ انہوں نے تنقید کی کہ وزیرِاعظم ’کٹّا‘ جیسے الفاظ استعمال کر رہے ہیں، جو عوام کو بھڑکانے کے لیے ہیں۔ پرینکا گاندھی نے زور دے کر کہا کہ ملک کے سب سے اعلیٰ عہدے پر فائز شخص کو ضبط، شائستگی اور وقار کا مظاہرہ کرنا چاہیے۔ انہوں نے اپنی تقریر کے دوران بہار میں آئندہ اسمبلی انتخابات کے لیے عوام سے کانگریس کو حمایت دینے کی اپیل بھی کی۔