نئی دہلی/ آواز دی وائس
مرکزی حکومت نے پیر کے روز ’پردھان منتری وکست ہندوستان روزگار یوجنا‘ (پی ایم وی بی آر وائی) کا پورٹل لانچ کر دیا۔ اس منصوبے کا مقصد اگست 2025 سے جولائی 2027 کے دوران ملک میں ساڑھے تین کروڑ سے زیادہ روزگار کے مواقع پیدا کرنے کو فروغ دینا ہے۔
مرکزی وزیر محنت و روزگار منسکھ ایل مانڈویہ نے پی ایم وی بی آر وائی کا پورٹل جاری کرتے ہوئے کہا کہ تقریباً ایک لاکھ کروڑ روپے کی اس مرکزی اسکیم سے آجروں (نئی بھرتی کرنے والے) اور پہلی بار نوکری کرنے والے دونوں ہی فائدہ اٹھا سکیں گے۔
مرکزی کابینہ نے 1 جولائی 2025 کو روزگار سے متعلق اس ترغیبی اسکیم کو منظوری دی تھی۔ اس کے لیے ایک لاکھ کروڑ روپے مختص کیے گئے ہیں اور مقصد یکم اگست 2025 سے 31 جولائی 2027 تک ساڑھے تین کروڑ روزگار کے مواقع پیدا کرنے کو فروغ دینا ہے۔
مانڈویہ نے کہا کہ آجر اور پہلی بار نوکری کرنے والے ملازمین اس پورٹل پر یا پھر ’اُمنگ‘ ایپ پر اپنا یونیورسل اکاؤنٹ نمبر ڈال کر اس اسکیم کا فائدہ اٹھا سکتے ہیں۔ یہ اسکیم دو حصوں میں تقسیم ہے۔ حصہ-اے ان ملازمین کے لیے ہے جو پہلی بار مزدور طبقے کا حصہ بنیں گے۔ اس میں زیادہ سے زیادہ 15,000 روپے ماہانہ تنخواہ (بیسک+ڈی اے) تک کے ملازمین کو اوسطاً ایک ماہ کی تنخواہ کے برابر ترغیبی رقم دو قسطوں میں دی جائے گی۔
وہیں، حصہ-بی کے تحت آجروں کو ترغیب دینے کا انتظام کیا گیا ہے۔ اس کے لیے تین سلیب مقرر کیے گئے ہیں
ملازم کی تنخواہ 10,000 روپے ماہانہ ہونے پر آجر کو 1,000 روپے کا ترغیبی فائدہ ملے گا۔
۔10,000 سے 20,000 روپے ماہانہ تنخواہ پر 2,000 روپے۔
اور 30,000 روپے تک کی تنخواہ والے ملازمین پر 3,000 روپے یکمشت ترغیبی رقم آجروں کو دی جائے گی۔
مانڈویہ نے کہا كہ یہ اسکیم ملک میں نئے روزگار کے مواقع کو بڑھاوا دے گی اور نئی بھرتی ہونے والے ملازمین کو براہِ راست ترغیبی رقم دے کر ان کی حوصلہ افزائی کرے گی۔ وزارتِ محنت نے ایک نوٹ میں کہا کہ حصہ-اے کے تحت ایک لاکھ روپے تک مجموعی تنخواہ پانے والے ملازمین مستحق ہوں گے، جبکہ حصہ-بی میں تمام شعبوں خصوصاً مینوفیکچرنگ سیکٹر میں اضافی روزگار پیدا کرنے کو فروغ دیا جائے گا۔
حصہ-بی کے تحت آجر کو ہر اضافی ملازم (پہلی بار نوکری کرنے والا یا دوبارہ نوکری کرنے والا) پر، اگر وہ کم از کم چھ ماہ تک لگاتار کام کرتا ہے، تو دو سال تک ہر ماہ زیادہ سے زیادہ 3,000 روپے کا ترغیبی فائدہ ملے گا۔ مینوفیکچرنگ سیکٹر کے معاملے میں یہ فائدہ چار سال تک دیا جائے گا۔
اہلیت کے لیے آجروں کو کم از کم دو (50 سے کم ملازمین والے ادارے) یا پانچ (50 سے زیادہ ملازمین والے ادارے) نئے ملازمین کی بھرتی کرنی ہوگی اور انہیں کم از کم چھ ماہ تک ملازمت پر رکھنا ہوگا۔
وزارت نے یہ بھی واضح کیا کہ ملازمین کی پروویڈنٹ فنڈ اینڈ مِسِلینئیس پروویژنز ایکٹ 1952 کے دائرے سے باہر کے ادارے بھی اس اسکیم کا حصہ بن سکیں گے۔ تاہم، اس کے لیے انہیں الیکٹرانک چالان اور ریٹرن داخل کرنا ہوگا اور ’اُمنگ‘ ایپ کے ذریعے اپنے تمام موجودہ اور نئے ملازمین کے لیے یو اے این اکاؤنٹ کھلوانے ہوں گے۔
