نئی دہلی : وزیر اعظم نریندر مودی جمہوریہ قبرص کے صدر نکوس کرسٹوڈولائڈس کی دعوت پر 15 تا 16 جون 2025 تک قبرص کا سرکاری دورہ کریں گے۔ یہ گزشتہ دو دہائیوں میں کسی ہندوستانی وزیر اعظم کا پہلا دورہ قبرص ہوگا۔اپنے اس دورے کے دوران، وزیر اعظم مودی نکوسیا میں صدر کرسٹوڈولائڈس کے ساتھ باضابطہ بات چیت کریں گے اور لیماسول میں کاروباری رہنماؤں سے خطاب بھی کریں گے۔ یہ دورہ دونوں ممالک کے درمیان دو طرفہ تعلقات کو مزید مستحکم کرنے کے ساتھ ساتھ بحیرہ روم اور یورپی یونین میں ہندوستان کی شراکت داری کو فروغ دینے کے عزم کی تجدید کرے گا۔اپنے دورے کے دوسرے مرحلے میں وزیر اعظم مودی 16 تا 17 جون 2025 کو کینیڈا کے شہر کناناسکیس میں منعقد ہونے والے G7 سربراہی اجلاس میں شرکت کریں گے۔ انہیں اس اجلاس میں شرکت کی دعوت کینیڈا کے وزیر اعظم مارک کارنی نے دی ہے۔ وزیر اعظم مودی کی یہ G7 اجلاس میں مسلسل چھٹی شرکت ہوگی۔
روانگی سے قبل ایک بیان میں وزیر اعظم نریندر مودی نے کہا کہ ۔ آج میں جمہوریہ قبرص، کینیڈا اور کروشیا کے تین ملکی دورے پر روانہ ہو رہا ہوں۔15 اور 16 جون کو میں جمہوریہ قبرص کا دورہ کروں گا۔ یہ دورہ صدر عالی مرتبت نکوس کرسٹوڈولائڈس کی دعوت پر ہو رہا ہے۔ قبرص بحیرہ روم کے خطے اور یورپی یونین میں بھارت کا قریبی دوست اور اہم شراکت دار ہے۔ یہ دورہ تاریخی رشتوں کو مزید مضبوط کرنے، تجارت، سرمایہ کاری، سلامتی، ٹیکنالوجی کے شعبوں میں تعلقات کو وسعت دینے اور عوامی سطح پر روابط کو فروغ دینے کا موقع فراہم کرے گا۔قبرص کے بعد میں کینیڈا کے کنانسکس جاؤں گا جہاں وزیر اعظم عالی مرتبت مارک کارنی کی دعوت پر جی-7 سربراہی اجلاس میں شرکت کروں گا۔ یہ اجلاس عالمی اہمیت کے مسائل اور عالمی جنوب کی ترجیحات پر خیالات کے تبادلے کا موقع فراہم کرے گا۔ میں شراکت دار ممالک کے رہنماؤں کے ساتھ ملاقاتوں کا بھی منتظر ہوں۔18 جون کو میں جمہوریہ کروشیا کا دورہ کروں گا اور صدر زوران میلانووچ اور وزیر اعظم آندریج پلینکوویچ سے ملاقاتیں کروں گا۔ ہمارے دونوں ممالک کے درمیان صدیوں پرانے قریبی ثقافتی روابط ہیں۔ کسی بھارتی وزیر اعظم کا کروشیا کا یہ پہلا دورہ ہے، جو باہمی دلچسپی کے شعبوں میں دو طرفہ تعاون کے نئے راستے کھولے گا۔یہ تین ملکی دورہ شراکت دار ممالک کا ان کی سرحد پار دہشت گردی کے خلاف بھارت کی جدوجہد میں مستقل حمایت کے لیے شکریہ ادا کرنے اور دہشت گردی کی ہر شکل اور نوعیت سے نمٹنے کے لیے عالمی فہم کو متحرک کرنے کا بھی ایک موقع ہے۔
PM @narendramodi emplanes for three-nation visit to Cyprus, Canada and Croatia. pic.twitter.com/dj3I2p9jnG
— PMO India (@PMOIndia) June 15, 2025
اس اجلاس کے دوران وزیر اعظم مودی G7 ممالک کے رہنماؤں، مدعو ممالک کے نمائندوں اور بین الاقوامی تنظیموں کے سربراہان کے ساتھ توانائی کی حفاظت، ٹیکنالوجی اور اختراعات سمیت دیگر اہم عالمی امور پر تبادلہ خیال کریں گے۔ اجلاس کے موقع پر وہ متعدد دو طرفہ ملاقاتیں بھی کریں گے۔اپنے دورے کے آخری مرحلے میں وزیر اعظم مودی 18 جون 2025 کو کروشیا کا سرکاری دورہ کریں گے۔ انہیں یہ دعوت کروشیا کے وزیر اعظم آندریج پلینکوویچ کی جانب سے دی گئی ہے۔ کسی ہندوستانی وزیر اعظم کا کروشیا کا یہ پہلا دورہ ہوگا، جو دونوں ممالک کے درمیان دو طرفہ تعلقات میں ایک نئے سنگِ میل کی حیثیت رکھتا ہے۔
وزیر اعظم مودی کروشین وزیر اعظم آندریج پلینکوویچ کے ساتھ دو طرفہ بات چیت کریں گے اور کروشیا کے صدر زوران میلانووچ سے بھی ملاقات کریں گے۔ وزارت خارجہ کی جانب سے ہفتہ کے روز جاری کردہ ایک اعلامیے کے مطابق، وزیر اعظم کا یہ دورہ ہندوستان کی یورپی یونین کے شراکت داروں کے ساتھ تعلقات کو مزید مضبوط بنانے کے عزم کی عکاسی کرے گا۔
