نئی دہلی:وزیر اعظم نریندر مودی آج رات 8:30 بجے قوم سے خطاب کرنے والے ہیں۔ امکان ہے کہ وہ خواتین کے ریزرویشن بل کے مسئلے پر بات کریں گے جو پارلیمنٹ میں اپوزیشن کی رکاوٹ کے باعث منظور نہیں ہو سکا۔

اس سے پہلے سابق مرکزی وزیر اسمرتی ایرانی نے کانگریس اور انڈیا اتحاد کے دیگر اتحادیوں کو شدید تنقید کا نشانہ بنایا۔ انہوں نے کہا کہ پارلیمنٹ میں خواتین کو 33 فیصد ریزرویشن دینے کے معاملے پر یہ پارٹیاں متحد ہونے میں ناکام رہیں۔

اسمرتی ایرانی نے کہا کہ ملک کی خواتین کو بتایا گیا تھا کہ کانگریس پارٹی نے ایک ایسا خواب دکھایا ہے جس کا مقصد خواتین کو سیاسی حقوق دینا ہے۔ انہوں نے کہا کہ 98 سال بعد اس ارادے کا کیا حال ہوا یہ کل پارلیمنٹ میں پورے ہندوستان کی خواتین نے دیکھ لیا۔ انہوں نے کہا کہ کانگریس نے مسکرا کر اور میزیں بجا کر خواتین کی امیدوں کو کچل دیا جبکہ بی جے پی کے لیے یہ صرف اقتدار کی لڑائی نہیں بلکہ برابری کے حق کی جدوجہد ہے۔

انہوں نے مزید کہا کہ خواتین کو یاد رہے گا کہ کانگریس کے 6 دہائیوں کے دور حکومت میں 11 کروڑ خواتین کو بیت الخلا تک رسائی نہیں ملی۔ 25 کروڑ خواتین کو بینک اکاؤنٹ کھولنے کی سہولت نہیں دی گئی۔ جبکہ بی جے پی این ڈی اے حکومت میں پہلی بار جینڈر بجٹ فریم ورک متعارف کرایا گیا۔

انہوں نے کہا کہ کانگریس کا اصل چہرہ اب ہندوستان کی خواتین کے سامنے آ چکا ہے۔ انہوں نے الزام لگایا کہ کانگریس اور اس کے اتحادیوں نے ان خواتین کے حقوق روکنے پر جشن منایا جو برسوں سے 33 فیصد نمائندگی کا مطالبہ کر رہی تھیں۔

جمعہ کے روز بی جے پی کی قیادت والی حکومت اس بل کو منظور کرانے کے لیے ضروری دو تہائی اکثریت حاصل کرنے میں ناکام رہی۔ لوک سبھا میں ووٹنگ کے دوران 298 اراکین نے بل کی حمایت کی جبکہ 230 نے مخالفت کی۔

لوک سبھا اسپیکر اوم برلا نے تصدیق کی کہ بل منظور نہیں ہو سکا۔ پارلیمانی امور کے وزیر کرن رجیجو نے کہا کہ حکومت اس سے متعلق دیگر قوانین کو آگے نہیں بڑھائے گی۔

دوسری جانب مرکزی وزیر داخلہ امت شاہ نے اپوزیشن پر خواتین کے ریزرویشن کو روکنے کا الزام لگایا۔ جبکہ اپوزیشن رہنما راہل گاندھی نے کہا کہ وہ خواتین کے ریزرویشن کے حامی ہیں لیکن اسے حد بندی سے جوڑنے کی مخالفت کرتے ہیں۔

راہل گاندھی نے کہا کہ حکومت ایک نیا بل لے کر آئی جسے خواتین کا بل بتایا گیا حالانکہ ایسا بل 2023 میں پہلے ہی منظور ہو چکا تھا۔ انہوں نے الزام لگایا کہ اس کے پیچھے اصل مقصد حد بندی تھا جس کے ذریعے تمل ناڈو اور دیگر جنوبی ریاستوں کی نمائندگی کمزور کرنا تھا۔ انہوں نے کہا کہ اپوزیشن نے پارلیمنٹ میں اس بل کو شکست دی۔

انہوں نے مزید کہا کہ ہندوستان ریاستوں کا اتحاد ہے جہاں ہر ریاست کو برابر کا حق ملنا چاہیے اور اپنی زبان اور ثقافت کے تحفظ کی آزادی ہونی چاہیے۔

ادھر بی جے پی اور اس کے اتحادی کانگریس اور انڈیا اتحاد کے خلاف احتجاج جاری رکھے ہوئے ہیں اور الزام لگا رہے ہیں کہ یہ اتحاد خواتین کے خلاف ہے اور انہیں آگے بڑھتے نہیں دیکھنا چاہتا۔