گوہاٹی/ آواز دی وائس

وزیرِ اعظم نریندر مودی ہفتہ کے روز آسام کے دو روزہ دورے پر پہنچیں گے، جہاں وہ کئی ترقیاتی منصوبوں کا آغاز کریں گے، بی جے پی کارکنوں سے گفتگو کریں گے اور عوامی اجتماعات سے خطاب کریں گے۔ حکام نے یہ معلومات فراہم کیں۔

حکام کے مطابق وزیرِ اعظم آسام کے پہلے وزیرِ اعلیٰ گوپیناتھ بورڈولائی کے 80 فٹ بلند مجسمے کی نقاب کشائی کریں گے۔ یہ مجسمہ معروف مجسمہ ساز رام ستار نے تیار کیا ہے اور اسے بورڈولائی کے نام سے منسوب ہوائی اڈے کے نئے ٹرمینل کے باہر نصب کیا گیا ہے۔رام ستار نے مغلوں کو شکست دینے والے عظیم آہوم سپہ سالار لاچت بوڑفکن کا 125 فٹ بلند مجسمہ بھی جورہاٹ میں تیار کیا تھا، جس کی نقاب کشائی وزیرِ اعظم نے مارچ 2024 میں کی تھی۔ رام ستار کا بدھ کے روز 100 برس کی عمر میں انتقال ہو گیا تھا۔

حکام نے بتایا کہ مجسمے کی نقاب کشائی کے بعد وزیرِ اعظم تقریباً 4 ہزار کروڑ روپے کی لاگت سے تعمیر کیے گئے نئے ٹرمینل کا افتتاح کریں گے اور وہاں تقریباً 15 منٹ قیام کریں گے۔ اس کے بعد وہ ٹرمینل عمارت کے عین باہر ایک عوامی جلسے سے خطاب کریں گے۔ جلسے کے بعد مودی وششٹھ علاقے میں واقع بی جے پی کے ریاستی ہیڈکوارٹر تک روڈ شو کریں گے، جہاں وہ پارٹی کارکنوں سے بات چیت کریں گے۔ وزیرِ اعلیٰ ہیمنت وشو شرما نے کہا کہ یہ پہلا موقع ہوگا جب کوئی وزیرِ اعظم ریاست میں بی جے پی کے دفتر کا دورہ کرے گا۔ انہوں نے اسے پارٹی کے لیے “تاریخی موقع” قرار دیا۔

پارٹی کے ایک عہدیدار نے بتایا کہ آئندہ سال کے آغاز میں مجوزہ اسمبلی انتخابات کے پیشِ نظر بی جے پی کارکنوں سے براہِ راست گفتگو خاصی اہم ہے۔ وزیرِ اعظم شہر کے خاناپاڑا علاقے میں کوئنا دھورا میں واقع سرکاری گیسٹ ہاؤس میں شب بسری کریں گے۔ دورے کے دوسرے دن کی شروعات وزیرِ اعظم مختلف اسکولوں کے 25 ہونہار طلبہ سے گفتگو سے کریں گے۔ اس کے بعد وہ برہم پتر ندی پر کروز شپ ‘چرائی دیو’ میں تقریباً آدھے گھنٹے تک ‘پریکشا پہ چرچا’ پروگرام میں حصہ لیں گے۔ وزیرِ اعظم 1979 میں شروع ہونے والی آسام تحریک کے دوران ہلاک ہونے والے 860 افراد کی یاد میں تعمیر کیے گئے نئے شہید اسمارکک شیتر کا دورہ کریں گے اور وہاں خراجِ عقیدت پیش کریں گے۔

اس کے ساتھ ہی وہ شہداء کی گیلری کا بھی معائنہ کریں گے، جہاں تحریک میں جان گنوانے والے 860 افراد کے مجسمے نصب ہیں، اور پہلے شہید خرگیشور تالکدار کے مجسمے پر گل پوشی کریں گے۔ حکام کے مطابق اس کے بعد وزیرِ اعظم ڈبروگڑھ اور نامروپ کے لیے روانہ ہوں گے، جہاں وہ 12 ہزار کروڑ روپے کی لاگت سے تعمیر ہونے والے امونیا-یوریا کھاد کارخانے کا بھومی پوجن کریں گے۔ حکام نے بتایا کہ یہ منصوبہ ریاست کی ترقی اور پیش رفت کو نمایاں رفتار فراہم کرے گا۔

نئی دہلی روانہ ہونے سے قبل وزیرِ اعظم نامروپ میں بھی ایک عوامی جلسے سے خطاب کریں گے۔ وزیرِ اعلیٰ نے سوشل میڈیا پلیٹ فارم ‘ایکس’ پر پوسٹ کرتے ہوئے کہا کہ وزیرِ اعظم نریندر مودی کا ماں کاماکھیا اور مہاپُرش شری منت شنکر دیو کی سرزمین پر دل کی گہرائیوں سے خیرمقدم ہے۔

انہوں نے مزید کہا کہ ہفتہ اور اتوار کو مودی آسام میں کئی ترقیاتی منصوبوں کا افتتاح کریں گے اور ہمارے بہادر شہداء کو خراجِ عقیدت پیش کریں گے۔