پٹنہ: بہار کی بانکی پور اسمبلی نشست کے ضمنی انتخاب کے ساتھ ساتھ گجرات کی منجل پور اور مدھیہ پردیش کی دتیا اسمبلی نشستوں کے لیے ڈالے گئے ووٹوں کی گنتی پیر کی صبح 8 بجے سخت حفاظتی انتظامات کے درمیان شروع ہوئی۔

سب سے زیادہ توجہ بہار کی بانکی پور نشست پر مرکوز رہی جہاں جن سوراج پارٹی کے بانی پرشانت کشور نے شاندار کامیابی حاصل کرتے ہوئے بھارتیہ جنتا پارٹی کے امیدوار نیرج کمار کو 19,324 ووٹوں کے فرق سے شکست دے دی۔ پرشانت کشور نے 64,151 ووٹ حاصل کیے جبکہ یہ مقابلہ اس لیے بھی اہم سمجھا جا رہا تھا کیونکہ وہ اس نشست پر بی جے پی کی تقریباً تین دہائیوں سے قائم سیاسی برتری کو ختم کرنے کی کوشش کر رہے تھے۔

مدھیہ پردیش کی دتیا اسمبلی نشست پر ضمنی انتخاب کانگریس کے رکن اسمبلی راجندر بھارتی کی دھوکہ دہی کے ایک مقدمے میں سزا کے بعد نااہلی کے سبب کرایا گیا تھا۔ اس نشست پر کانگریس کے گھنشیام سنگھ نے 66,757 ووٹ حاصل کر کے اپنی جماعت کی کامیابی برقرار رکھی۔ انہوں نے بی جے پی کے آشوتوش تیواری کو 6,016 ووٹوں سے شکست دی۔

گجرات کی منجل پور اسمبلی نشست پر ضمنی انتخاب بی جے پی کے سینئر رکن اسمبلی یوگیش پٹیل کے انتقال کے بعد منعقد ہوا۔ یہاں بی جے پی اور کانگریس کے درمیان براہ راست مقابلہ دیکھنے کو ملا۔ بی جے پی کے ستیندر بھائی پٹیل نے 55,481 ووٹ حاصل کر کے کامیابی اپنے نام کی جبکہ کانگریس کے بھیکھا بھائی رباری کو 24,851 ووٹ ملے۔ اس طرح بی جے پی امیدوار نے 30,630 ووٹوں کے واضح فرق سے فتح حاصل کی۔

ان تینوں ضمنی انتخابات کے نتائج کو آئندہ ریاستی اسمبلی انتخابات سے قبل ایک اہم سیاسی اشارہ تصور کیا جا رہا ہے۔ تاہم سیاسی مبصرین کا ماننا ہے کہ ان نتائج سے متعلقہ ریاستوں کی موجودہ حکومتوں کے استحکام پر کوئی فوری اثر پڑنے کا امکان نہیں ہے۔