تہران: ایران میں بگڑتی ہوئی سکیورٹی صورتحال کے پیش نظر ایران میں بھارتی سفارت خانے نے اتوار کو ایک نئی سفری ایڈوائزری جاری کرتے ہوئے بھارتی شہریوں کو فی الحال ایران کا سفر مؤخر کرنے اور وہاں موجود شہریوں کو عارضی طور پر ملک چھوڑنے پر غور کرنے کا مشورہ دیا ہے۔

تہران میں بھارتی سفارت خانے نے سوشل میڈیا پلیٹ فارم ایکس پر جاری بیان میں کہا کہ حالیہ دنوں میں ایران میں عدم استحکام اور کشیدگی میں نمایاں اضافہ ہوا ہے، اس لیے جو بھارتی شہری کسی بھی مقصد سے ایران جانے کا ارادہ رکھتے ہیں وہ سکیورٹی صورتحال بہتر ہونے تک اپنا سفر ملتوی کر دیں۔

سفارت خانے نے ایران میں مقیم بھارتی شہریوں سے کہا ہے کہ وہ دستیاب فضائی پروازوں کے ذریعے عارضی طور پر ایران سے نکلنے پر غور کریں۔ تاہم جو شہری ایران میں ہی رہنے کا فیصلہ کریں، انہیں انتہائی احتیاط برتنے کی ہدایت دی گئی ہے۔

ایڈوائزری میں کہا گیا ہے کہ بھارتی شہری حالات پر مسلسل نظر رکھیں، خبروں سے باخبر رہیں اور خاص طور پر ایران کے جنوبی ساحلی علاقوں سمیت ان مقامات سے دور رہیں جہاں فوجی سرگرمیاں زیادہ دیکھی جا رہی ہیں۔ اس کے علاوہ مقامی حکام کی تمام ہدایات پر سختی سے عمل کرنے کی بھی تاکید کی گئی ہے۔

بھارتی سفارت خانے نے ان تمام بھارتی شہریوں سے بھی فوری طور پر اپنا اندراج کرانے کی اپیل کی ہے جنہوں نے ابھی تک سفارت خانے میں اپنی معلومات درج نہیں کرائیں، اور انہیں سفارت خانے کی ویب سائٹ اور سوشل میڈیا پلیٹ فارمز پر جاری ہونے والی تازہ معلومات پر مسلسل نظر رکھنے کا مشورہ دیا ہے۔

سفارت خانے نے ہنگامی رابطے کے لیے درج ذیل نمبرز جاری کیے ہیں:
+989128109115، +989128109102، +989128109109، +989932179359
ای میل: [email protected]

یہ ایڈوائزری ایسے وقت میں جاری کی گئی ہے جب امریکہ اور ایران کے درمیان کشیدگی مزید شدت اختیار کر گئی ہے۔ اطلاعات کے مطابق امریکہ نے ایران میں زیرِ تعمیر دارخوین جوہری تنصیب اور دیگر فوجی اہداف پر حملے کیے ہیں، جبکہ ایران نے بھی امریکی اتحادیوں کے خلاف ڈرون کارروائیاں کی ہیں۔

بین الاقوامی ایٹمی توانائی ایجنسی (IAEA) نے کہا ہے کہ وہ ایران کے صوبہ خوزستان میں زیرِ تعمیر دارخوین جوہری پلانٹ پر مبینہ حملے کی اطلاعات کا جائزہ لے رہی ہے۔ ایجنسی کے مطابق یہ تنصیب ابھی ابتدائی مرحلے میں ہے اور اس کے آخری معائنے کے وقت وہاں کوئی جوہری مواد موجود نہیں تھا، اس لیے فی الحال کسی تابکاری خطرے کا اندیشہ نہیں ہے۔

بعد ازاں ایران نے دعویٰ کیا کہ امریکہ نے مقامی وقت کے مطابق صبح 3 بج کر 39 منٹ پر دارخوین جوہری پلانٹ کو نشانہ بنایا۔ ایرانی حکام کے مطابق اسلامی انقلابی گارڈ کور (IRGC) نے اہواز کے قریب ایک امریکی ایم کیو-9 ڈرون کو بھی مار گرایا، جبکہ نیم سرکاری خبر رساں ایجنسی تسنیم نے جزیرہ قشم پر تازہ امریکی فضائی حملوں کی بھی اطلاع دی ہے۔

دوسری جانب امریکی سینٹرل کمان (CENTCOM) نے اعلان کیا ہے کہ صدر ڈونلڈ ٹرمپ کی ہدایت پر ایران کے خلاف مزید فوجی کارروائیاں کی گئی ہیں۔ امریکی فوج کے مطابق ان حملوں میں ایران کے ساحلی نگرانی کے نظام، فضائی دفاعی تنصیبات، بحری اثاثوں اور میزائل و ڈرون ذخائر کو نشانہ بنایا گیا تاکہ ایران کی عسکری صلاحیت کو مزید کمزور کیا جا سکے۔

سینٹکام نے یہ بھی دعویٰ کیا کہ امریکی افواج نے ان ایرانی پاسدارانِ انقلاب (IRGC) اہلکاروں کو بھی نشانہ بنایا جو اردن میں امریکی فوجیوں پر حملوں کے ذمہ دار تھے۔ امریکی فوج کے مطابق ان کارروائیوں کا مقصد آبنائے ہرمز میں تجارتی جہاز رانی کو لاحق خطرات کم کرنا اور ایران کی عسکری صلاحیت کو مزید محدود کرنا ہے۔