کولکاتا: مغربی بنگال کی سابق وزیر اعلیٰ ممتا بنرجی نے جمعہ کو دعویٰ کیا کہ ان کے دورِ حکومت میں پولیس کا چہرہ انسانی تھا، لیکن بی جے پی نے پولیس کو ایک ’’شیطانی شکل‘‘ دے دی ہے۔ کولکاتا میں ترنمول کی طلبہ شاخ کی ایک ریلی سے خطاب کرتے ہوئے بنرجی نے کہا کہ وہ اپنے حامیوں کے خلاف ہونے والی ’’پولیس کی زیادتیوں‘‘ کو روکیں گی۔

بنرجی نے کہا کہ رکشا بندھن کے موقع پر انہوں نے یہ عہد کیا ہے۔ انہوں نے الزام لگایا، ’’بی جے پی بنگال میں تقسیم کی سیاست کر رہی ہے اور لوگوں میں خوف پھیلانے کے لیے پولیس کا استعمال کر رہی ہے۔‘‘ ترنمول کانگریس کی سربراہ نے کہا کہ وہ جلد ہی پورے ریاست کا دورہ شروع کریں گی اور اگر انہیں عوامی جلسے کرنے کی اجازت نہیں دی گئی تو وہ سڑکوں پر پیدل چلیں گی۔

ریاست کے مختلف حصوں میں پارٹی رہنماؤں پر مبینہ حملوں کو لے کر حکمراں بی جے پی کو نشانہ بناتے ہوئے انہوں نے کہا، ’’میں دیکھوں گی کہ ان کے پاس کتنے انڈے اور اینٹیں جمع ہیں۔‘‘ بنرجی نے کہا کہ جب بھی انتظامیہ ان کی ریلیوں کی اجازت دینے سے انکار کرتی ہے، وہ ہر بار اجازت لینے کے لیے عدالت کا وقت ضائع نہیں کرنا چاہتیں۔ انہوں نے کہا، ’’اب سے ہم جن مقامات پر جلسے کرنا چاہتے ہیں، وہاں جلسہ کرنے کے لیے عوام سے اجازت لیں گے۔‘

‘ سابق وزیر اعلیٰ نے الزام لگایا کہ بی جے پی نے الیکشن کمیشن کا استعمال کرتے ہوئے گزشتہ اسمبلی انتخابات کو ’’ہائی جیک‘‘ کر لیا تھا۔ بنرجی نے دعویٰ کیا، ’’انہوں نے ووٹر لسٹ سے لاکھوں نام غیر قانونی طور پر حذف کرکے ووٹ لوٹنے کے لیے ایس آئی آر کا استعمال کیا۔‘‘

بنرجی نے ریاست میں جاری بے دخلی کی کارروائیوں کو لے کر وزیر اعلیٰ شوبھندو ادھیکاری کی حکومت کو بھی نشانہ بنایا۔ انہوں نے کہا، ’’مجھے فٹ پاتھوں سے ریڑھی پٹری والوں کو ہٹانے پر کوئی اعتراض نہیں ہے، بشرطیکہ ان کی مناسب طریقے سے بازآبادکاری کی جائے۔ اگر آپ ان کی بازآبادکاری نہیں کر سکتے تو انہیں ہر ماہ 25,000 روپے معاوضہ دیں۔‘‘