نئی دہلی/ آواز دی وائس

وزیرِاعظم نریندر مودی 13 سے 15 ستمبر تک میزورم، منی پور، آسام، مغربی بنگال اور بہار کا دورہ کریں گے۔ وہ سب سے پہلے کل میزورم کا دورہ کریں گے اور صبح تقریباً 10 بجے آئیزول میں 9000 کروڑ روپے سے زیادہ کی کئی ترقیاتی منصوبوں کا سنگِ بنیاد رکھیں گے اور افتتاح کریں گے۔ اس دوران وزیرِاعظم ایک عوامی اجتماع سے بھی خطاب کریں گے۔ اس کے بعد وزیرِاعظم منی پور کا دورہ کریں گے اور دوپہر تقریباً 12:30 بجے چُراچاندپور میں 7,300 کروڑ روپے سے زائد کے کئی ترقیاتی منصوبوں کا سنگِ بنیاد رکھیں گے۔ وہ یہاں بھی موجود عوامی اجتماع سے خطاب کریں گے۔

وزیرِاعظم دوپہر بعد تقریباً 2:30 بجے امفال میں 1,200 کروڑ روپے سے زیادہ کے مختلف منصوبوں کا افتتاح کریں گے اور ایک عوامی تقریب سے خطاب کریں گے۔ اس کے بعد وزیرِاعظم آسام کا دورہ کریں گے اور شام تقریباً 5 بجے گوہاٹی میں بھارت رتن ڈاکٹر بھوپین ہزاریکا کی 100ویں جینتی کے پروگرام میں شرکت کریں گے۔ 14 ستمبر کو وزیرِاعظم آسام میں 18,530 کروڑ روپے سے زائد لاگت والے اہم بنیادی ڈھانچے اور صنعتی ترقی کے منصوبوں کا افتتاح اور سنگِ بنیاد رکھیں گے۔ وہ صبح تقریباً 11 بجے درانگ میں تمام منصوبوں کا سنگِ بنیاد رکھیں گے اور عوامی اجتماع سے خطاب کریں گے۔

وزیرِاعظم مودی دوپہر تقریباً 1:45 بجے گولاگھاٹ میں آسام بایو-ایتھانول پرائیویٹ لمیٹڈ کے نومالیگڑھ ریفائنری پلانٹ کا افتتاح کریں گے۔ وہ گولاگھاٹ میں پولی پروپیلین پلانٹ کی بنیاد بھی رکھیں گے۔ 15 ستمبر کو وزیرِاعظم مغربی بنگال کا دورہ کریں گے اور صبح تقریباً 9:30 بجے کولکاتا میں 16ویں مشترکہ کمانڈرز کانفرنس 2025 کا افتتاح کریں گے۔

وزیرِاعظم بہار میں مکھانا بورڈ کا افتتاح کریں گے

وزیرِاعظم بنگال کے دورے کے بعد بہار روانہ ہوں گے اور دوپہر تقریباً 2:45 بجے پورنیہ ہوائی اڈے کی نئی ٹرمینل عمارت کا افتتاح کریں گے۔ اس کے علاوہ وہ پورنیہ میں تقریباً 36,000 کروڑ روپے کی لاگت والے کئی ترقیاتی منصوبوں کا سنگِ بنیاد اور افتتاح کریں گے اور اس موقع پر عوامی اجتماع سے خطاب کریں گے۔ وہ بہار میں قومی مکھانا بورڈ کا بھی افتتاح کریں گے۔ یہ بورڈ پیداوار اور نئی ٹیکنالوجی کی ترقی کو فروغ دے گا، کٹائی کے بعد کے انتظام کو مضبوط کرے گا، ویلیو ایڈیشن اور پراسیسنگ کو فروغ دے گا اور مکھانا کی مارکیٹ، برآمدات اور برانڈ ڈیولپمنٹ کو آسان بنائے گا، جس سے بہار اور پورے ہندوستان کے مکھانا کسانوں کو فائدہ ہوگا۔

ملک کی مجموعی مکھانا پیداوار میں بہار کا حصہ تقریباً 90 فیصد ہے۔ مدھوبنی، دربھنگہ، سیتا مڑھی، سہرسا، کٹیہار، پورنیہ، سپول، کشن گنج اور ارریہ جیسے اہم اضلاع مکھانا پیداوار کے بڑے مراکز ہیں کیونکہ ان اضلاع کا موسم اور زرخیز مٹی مکھانا کے اعلیٰ معیار میں مددگار ہے۔ بہار میں مکھانا بورڈ کے قیام سے ریاست اور ملک میں مکھانا پیداوار کو خاصا فروغ ملے گا اور اس شعبے میں عالمی نقشے پر بہار کی موجودگی مزید مضبوط ہوگی۔