نئی دہلی/ آواز دی وائس
وزیراعظم نریندر مودی کا یومِ پیدائش اس بار بھی نہایت خاص انداز میں منانے کی تیاری کی جا رہی ہے۔ بی جے پی نے 17 ستمبر سے 2 اکتوبر تک ’سیوا پکھواڑا‘ منانے کا فیصلہ کیا ہے۔ اس دوران پورے ملک میں متعدد پروگرام منعقد کیے جائیں گے۔ اسی سلسلے میں وزیراعظم مودی اپنے یومِ پیدائش (17 ستمبر) کے موقع پر ’صحت مند ناری، بااختیار پریوار مہم‘ کا آغاز کریں گے، جس کا مقصد پورے ملک میں خواتین اور بچوں کے لیے صحت کی خدمات کو مزید مضبوط بنانا ہے۔
بی جے پی کے قومی صدر اور مرکزی وزیر جے پی نڈا نے سوشل میڈیا پر ایک پوسٹ شیئر کی ہے جس میں انہوں نے بتایا کہ وزیراعظم نریندر مودی 17 ستمبر 2025 کو ’صحت مند ناری، بااختیار پریوار مہم‘ کا آغاز کریں گے۔ اس پہل کا مقصد پورے ہندوستان میں خواتین اور بچوں کے لیے صحت کی خدمات کو بہتر بنانا، ان تک آسان رسائی، معیاری نگہداشت اور آگاہی کو یقینی بنانا ہے۔
۔75,000 صحت کیمپ لگائے جائیں گے
نڈا نے بتایا کہ اس ملک گیر مہم کے تحت، آیوشمان آروگیہ مندروں، کمیونٹی ہیلتھ سینٹروں اور دیگر صحت سہولیات میں 75,000 صحت کیمپ لگائے جائیں گے۔ انہوں نے کہا کہ یہ کیمپ خاص طور پر خواتین اور بچوں کی صحت کی ضروریات پوری کرنے کے لیے تیار کیے گئے ہیں، جہاں انہیں تمام ضروری خدمات فراہم کی جائیں گی، جو حکومت کے شمولیتی صحت کے تصور کو آگے بڑھاتے ہیں۔
آنگن واڑیوں میں ’پوشن ماہ‘ منایا جائے گا
مزید وزیر نے کہا کہ اس کے علاوہ، غذائیت، صحت آگاہی اور مجموعی بہبود کو فروغ دینے کے لیے تمام آنگن واڑی مراکز میں ’پوشن ماہ‘ منایا جائے گا۔ ان اقدامات کا مقصد پورے ملک میں صحت مند خاندانوں اور بااختیار برادریوں کی تعمیر ہے۔
جے پی نڈا کی اپیل
بی جے پی صدر نے نجی اسپتالوں اور صحت خدمات سے جڑے افراد سے بھی اپیل کی کہ وہ آگے آئیں اور اس عوامی شراکت داری مہم کا حصہ بنیں۔ نڈا نے اپنی پوسٹ میں کہاکہ ہندوستان اولین کو اپنی تحریک مانتے ہوئے، آئیے ہم ایک ترقی یافتہ ہندوستان کے لیے اپنی اجتماعی کوششوں کو مضبوط کریں۔
وزیراعظم مودی کے یومِ پیدائش پر بی جے پی کی جانب سے منعقد ہونے والا سیوا پکھواڑا نہ صرف صحت اور ترقیاتی منصوبوں کے لحاظ سے اہم ہے بلکہ یہ ایک سیاسی پیغام بھی ہے۔ یہ پروگرام ظاہر کرتا ہے کہ حکومت ترقی اور عوامی فلاح کو اپنی اولین ترجیح دیتی ہے۔
