نئی دہلی: وزیر اعظم نریندر مودی ہفتہ کو انڈین انسٹی ٹیوٹ آف ٹیکنالوجی (آئی آئی ٹی) دہلی کے 57ویں جلسۂ تقسیم اسناد سے خطاب کریں گے۔ تقریب کے دوران 587 پی ایچ ڈی ریسرچ اسکالرز سمیت 3,000 سے زائد طلبہ کو ڈگریاں دی جائیں گی۔

ایک سرکاری بیان میں جمعہ کو کہا گیا کہ اس موقع پر وزیر اعظم باصلاحیت طلبہ کو ان کی تعلیمی کارکردگی کے اعتراف میں ادارے کے اعلیٰ ترین اعزازات سے نوازیں گے۔ ان میں صدر جمہوریہ گولڈ میڈل، ڈائریکٹر گولڈ میڈل، شنکر دیال شرما گولڈ میڈل اور پرفیکٹ ٹین گولڈ میڈل شامل ہیں۔

جدید تحقیق اور مصنوعی ذہانت (اے آئی) کو فروغ دینے کے ملک کے عزم کے تحت وزیر اعظم آئی آئی ٹی دہلی کے سونی پت کیمپس میں قائم اے آئی سے لیس اعلیٰ کارکردگی والے سپر کمپیوٹنگ مرکز ’پرم پرگیہ‘ کا افتتاح بھی کریں گے۔ اس سپر کمپیوٹنگ سہولت سے ادارے کی اے آئی، ڈیٹا سائنس، جدید کمپیوٹنگ اور بین الشعبہ جاتی تحقیق کی صلاحیتوں میں نمایاں اضافہ ہونے کی توقع ہے۔