نئی دہلی:وزیراعظم نریندر مودی نے ہفتے کے روز گروپ کیپٹن شبھانشو شُکلا سے گفتگو کی، جو اس وقت ناساکے ایکسیئم 4 مشن کے تحت بین الاقوامی خلائی مرکز پر ہیں۔ شبھانشو شُکلا بدھ کے روز یادگار سفر کے لیے بین الاقوامی خلائی اسٹیشن روانہ ہوئے، جو 41 سال کے وقفے کے بعد ہندوستان کی انسانی خلائی پرواز کی واپسی کی علامت ہے۔

وزیراعظم مودی نے شبھانشو سے کہا: آپ آج ماتربھومی سے، ہندوستانی دھرتی سے، سب سے دور ہیں، لیکن ہندوستان کے دلوں کے سب سے قریب ہیں۔ آپ کے نام میں بھی 'شُبھ' ہے اور آپ کا سفر نئے دور کا شُبھ آغاز بھی ہے۔ اس وقت بات ہم دونوں کر رہے ہیں، لیکن میرے ساتھ 140 کروڑ ہندوستانیوں کے جذبات بھی شامل ہیں۔

میری آواز میں تمام ہندوستانیوں کا جوش و ولولہ ہے۔ میں آپ کو خلاء میں ہندوستان کا پرچم لہرانے پر دل کی گہرائیوں سے مبارکباد اور نیک تمنائیں دیتا ہوں۔ میں زیادہ وقت نہیں لوں گا، سب سے پہلے یہ بتائیں کہ وہاں سب خیریت ہے؟ آپ کی صحت ٹھیک ہے؟

اس کے جواب میں گروپ کیپٹن شبھانشو شُکلا نے کہا: جی وزیراعظم جی، آپ اور 140 کروڑ دیسیوں کی دعاؤں کے لیے بہت شکریہ۔ میں یہاں بالکل ٹھیک ہوں، محفوظ ہوں، آپ سب کے آشیرواد اور محبت کی بدولت۔ بہت اچھا محسوس ہو رہا ہے۔ یہ ایک بہت نیا تجربہ ہے۔ کہیں نہ کہیں بہت سی چیزیں ایسی ہیں جو ظاہر کرتی ہیں کہ میں جیسے لوگ ملک میں اس سمت میں بڑھ رہے ہیں۔

انہوں نے مزید کہایہ جو میری یہ سفر ہے، یہ زمین سے مدار کی تقریباً 400 کلومیٹر کی چھوٹی سی پرواز ہے، یہ صرف میری نہیں بلکہ میرے ملک کی بھی پرواز ہے۔ جب میں چھوٹا تھا، میں کبھی تصور نہیں کر سکتا تھا کہ میں خلانورد بن سکوں گا۔ لیکن مجھے لگتا ہے کہ آپ کی قیادت میں آج کا ہندوستان یہ موقع دیتا ہے اور ان خوابوں کو حقیقت کا روپ دینے کا بھی موقع دیتا ہے۔

یہ میرے لیے ایک بہت بڑی کامیابی ہے۔ میں بے حد فخر محسوس کر رہا ہوں کہ میں یہاں اپنے ملک کی نمائندگی کر پا رہا ہوں۔ اس کے بعد وزیراعظم نے پوچھا: شُبھ، آپ دور خلا میں ہیں جہاں کشش ثقل تقریباً نہیں ہوتی، مگر ہر ہندوستانی دیکھ رہا ہے کہ آپ کتنے زمین سے جڑے ہوئے ہیں۔ آپ جو گاجر کا حلوہ لے گئے، کیا اسے اپنے ساتھیوں کو کھلایا؟

گروپ کیپٹن نے جواب دیا جی وزیراعظم جی، میں نے یہاں کچھ قومی خوراکیں لائیں تھیں، جیسے گاجر کا حلوہ، مونگ دال کا حلوہ اور آم رَس۔ میں چاہتا تھا کہ میرے بین الاقوامی ساتھی بھی اس کا مزہ چکھیں اور ہندوستان کی اس امیر ثقافتی وراثت کو محسوس کریں۔ ہم سب مل کر بیٹھ کر کھایا، اور سب کو بہت پسند آیا۔

وزیراعظم نے پوچھا پرِکرما، یعنی گردش کرنا، ہندوستان کی قدیم روایت ہے۔ آپ کو تو مادرِ زمین کی گردش کرنے کا اعزاز بھی ملا۔ ابھی آپ زمین کے کس حصے کے اوپر سے گزر رہے ہونگے؟ گروپ کیپٹن نے جواب دیا اس وقت میرے پاس اس کی مخصوص معلومات موجود نہیں، لیکن کچھ دیر پہلے میں کھڑکی سے باہر دیکھ رہا تھا تو ہم ہوائی کے اوپر سے گزر رہے تھے۔ ہم ایک دن میں 16 بار زمین کی گردش کرتے ہیں، 16 طلوعِ آفتاب اور 16 غروبِ آفتاب دیکھتے ہیں۔

یہ ایک حیران کن عمل ہے۔ اس وقت ہم تقریباً 28,000 کلومیٹر فی گھنٹہ کی رفتار سے سفر کر رہے ہیں—یہ رفتار آپ کے اندر محسوس نہیں ہوتی کیونکہ ہم خود اندر ہیں—لیکن یہ رفتار ظاہر کرتی ہے کہ ہمارا ملک کتنی تیزی سے ترقی کر رہا ہے۔