نئی دہلی: وزیراعظم نریندر مودی نے من کی بات پروگرام کے 123ویں ایپیسوڈ میں یوگا کے عالمی دن کی کامیابی پر بات کی۔ انہوں نے کہا: آپ سب اس وقت یوگا کی توانائی اور یوگا ڈے کی یادوں سے بھرے ہوئے ہوں گے۔

اس بار بھی 21 جون کو کروڑوں لوگوں نے ملک و بیرونِ ملک یوگا ڈے میں حصہ لیا۔ یاد ہے، یہ سلسلہ 10 سال پہلے شروع ہوا تھا، اور ہر سال پہلے سے بھی زیادہ شاندار بنتا جا رہا ہے۔ انہوں نے مزید کہا:وشاکھا پٹنم کے سمندر کنارے تین لاکھ افراد نے بیک وقت یوگا کیا۔ دو ہزار سے زیادہ قبائلی طلبا نے 108 منٹ تک 108 سوریا نمسکار کیے۔ یہ نظم و ضبط اور عقیدت کی اعلیٰ مثال ہے۔

انہوں نے کہا کہ ہمالیہ کی برف پوش چوٹیوں پر آئی ٹی بی پی کے جوانوں نے بھی یوگا کیا۔ وڈنگر میں 2121 افراد نے ایک ساتھ بھجنگ آسان کیا اور ریکارڈ قائم کیا۔ نیوی کے بحری جہازوں پر بھی یوگا کی شاندار جھلک دیکھنے کو ملی۔ تلنگانہ میں تین ہزار خصوصی افراد نے یوگا میں حصہ لیا۔ اس بار کی تھیم تھی — ایک زمین، ایک صحت۔ یہ صرف نعرہ نہیں بلکہ وسودھیو کٹمبکم کے جذبے کا اظہار ہے۔

وزیراعظم نے کہا: جب کوئی یاترا پر نکلتا ہے، تو دل میں یہی جذبہ ہوتا ہے کہ ’چلو بلاوا آیا ہے‘۔ یہ یاترائیں جسم کے نظم و ضبط، دل کی صفائی، بھائی چارے، اور بھگوان سے جڑنے کا ذریعہ ہوتی ہیں۔ ساتھ ہی، ان یاتراؤں میں خدمت کا ایک بہت بڑا پہلو بھی ہوتا ہے۔

انہوں نے جگن ناتھ رتھ یاترا کا ذکر کرتے ہوئے کہا کہ لاکھوں عقیدت مند اس میں شامل ہوتے ہیں، اور یہ ‘ایک بھارت-شریشٹھ بھارت’ کے جذبے کی عکاس ہے۔ وزیراعظم نے یاترا کرنے والوں کو نیک تمنائیں اور خدمت میں لگے لوگوں کو شکریہ ادا کیا۔ وزیراعظم نے کہا: ایمرجنسی لگانے والوں نے نہ صرف ہمارے آئین کا قتل کیا بلکہ عدلیہ کو بھی غلام بنانے کی کوشش کی۔ اس دور میں لوگوں کو بڑی سطح پر ستایا گیا۔

بابو جگجیون رام نے اس بارے میں بہت مضبوط موقف اختیار کیا۔ جارج فرنینڈس کو زنجیروں میں جکڑا گیا۔ ایم آئی ایس اے قانون کے تحت کسی کو بھی گرفتار کیا جاتا تھا۔ طلبا کو بھی نشانہ بنایا گیا۔ اظہارِ رائے کی آزادی کو کچلا گیا۔ انہوں نے کہا کہ آخرکار جیت عوام کی ہوئی اور ایمرجنسی ہٹا دی گئی۔

وزیراعظم نے کہا کہ عالمی ادارہ صحت نے ہندوستان کو ٹریکوما فری قرار دیا ہے۔ یہ کامیابی ہمارے ہیلتھ ورکرز کی ہے۔ آج 95 کروڑ افراد کسی نہ کسی سماجی تحفظ کی اسکیم سے مستفید ہو رہے ہیں، جبکہ 2015 میں یہ تعداد صرف 25 کروڑ تھی۔ وزیراعظم نے کہا بودو لینڈ آج نئے روپ میں سامنے آ رہا ہے۔ یہاں کے نوجوانوں کا جوش اور اعتماد فٹبال میدان میں خوب نظر آ رہا ہے۔

بودو لینڈ سی ای ایم کپ صرف ٹورنامنٹ نہیں بلکہ اتحاد اور اُمید کا تہوار بن گیا ہے۔ "3,700 سے زیادہ ٹیمیں، 70,000 کھلاڑی، جن میں بیٹیوں کی بھی بڑی تعداد شامل ہے — یہ بودو لینڈ میں تبدیلی کی کہانی سناتے ہیں۔ ہالی چرن نارجاری، درگا بورو، اپورنا نارجاری، منبیر بوسوماتری — یہ صرف کھلاڑی نہیں بلکہ اس نئی نسل کی پہچان ہیں جو بودو لینڈ کو قومی سطح پر لے کر آئے۔

وزیراعظم نے بتایا کہ حال ہی میں میگھالیہ کے ایری سلک کو جی آئی ٹَیگ ملا ہے۔ یہ ایک روایتی خاموش ریشم ہے جسے حاصل کرنے کے لیے کیڑے کو مارا نہیں جاتا، اس لیے اسے ’اہنسا سلک‘ بھی کہا جاتا ہے۔ یہ سلک سردی میں گرم اور گرمی میں ٹھنڈک دیتا ہے — عالمی منڈی کے لیے ایک بہترین پراڈکٹ ہے۔