نئی دہلی: وزیراعظم نریندر مودی نے منگل کو دیوالی کے موقع پر ملک کے شہریوں کو ایک خط لکھا، جس میں "آپریشن سندور" کی کامیابیوں اور نکسل ازم کے خلاف جاری جنگ پر روشنی ڈالی۔ انہوں نے کہا کہ جب دنیا مختلف بحرانوں سے دوچار ہے، ایسے وقت میں ہندوستان استحکام کی علامت بن کر اُبھرا ہے۔

وزیراعظم نے جی ایس ٹی (گڈز اینڈ سروسز ٹیکس) کی شرحوں میں کمی کے فیصلے کو اپنی حکومت کی تاریخی کامیابی قرار دیا اور کہا کہ ’جی ایس ٹی بچت اُتسو‘ کے دوران شہری ہزاروں کروڑ روپے کی بچت کر رہے ہیں۔ انہوں نے عوام سے اپیل کی کہ ‘ایک ہندوستان، شریشٹھ ہندوستان’ (ایک ہندوستان، عظیم ہندوستان) کے جذبے کو فروغ دیں، مقامی مصنوعات کو اپنائیں، تمام زبانوں کا احترام کریں، صحت کو ترجیح دیں اور یوگا کو اپنی زندگی کا حصہ بنائیں۔

نریندر مودی نے یہ خط ملک کے شہریوں کو دیوالی کی مبارکباد دینے کے لیے لکھا، ایک دن بعد جب انہوں نے دیسی ساختہ طیارہ بردار جنگی بحری جہاز آئی این ایس وکرانت پر بحریہ کے جوانوں کے ساتھ دیوالی منائی۔ انہوں نے لکھا: میں آپ سب کو توانائی اور جوش سے بھرے ہوئے مقدس تہوار دیوالی کی دلی مبارکباد پیش کرتا ہوں۔ ایودھیا میں شری رام مندر کی شاندار تعمیر کے بعد یہ دوسری دیوالی ہے۔"

وزیراعظم نے کہا: بھگوان شری رام ہمیں وقار اور اصولوں (مرُیادا) پر قائم رہنا سکھاتے ہیں اور ناانصافی کے خلاف لڑنے کا حوصلہ دیتے ہیں۔ اس کی زندہ مثال ہمیں کچھ ماہ قبل 'آپریشن سندور' کے دوران دیکھنے کو ملی۔ اس دوران ہندوستان نے نہ صرف اپنے اصولوں کی پیروی کی بلکہ ناانصافی کا منہ توڑ جواب بھی دیا۔" انہوں نے کہا کہ یہ دیوالی خاص ہے کیونکہ پہلی بار ملک کے کئی اضلاع، جن میں دور دراز کے علاقے بھی شامل ہیں، میں دیے جلیں گے۔

انہوں نے مزید کہا: یہ وہ اضلاع ہیں جہاں نکسل ازم اور ماؤ وادی دہشتگردی کا مکمل طور پر خاتمہ ہو چکا ہے۔ حالیہ دنوں میں ہم نے دیکھا کہ کئی افراد نے تشدد کا راستہ چھوڑ کر، ملک کے آئین پر اعتماد ظاہر کیا اور ترقی کی مرکزی دھارے میں شامل ہو گئے۔ یہ قوم کے لیے ایک بڑی کامیابی ہے۔"

وزیراعظم نے یہ بھی کہا کہ ان تاریخی کامیابیوں کے ساتھ ساتھ، ہندوستان نے حالیہ دنوں میں آئندہ نسل کے لیے اصلاحات کا آغاز کیا ہے۔ انہوں نے کہا: نوراتری کے پہلے دن جی ایس ٹی کی کم شرحیں نافذ کی گئیں۔ ’جی ایس ٹی بچت اُتسو‘ کے دوران شہری ہزاروں کروڑ روپے کی بچت کر رہے ہیں۔" انہوں نے زور دے کر کہا کہ دنیا جہاں کئی بحرانوں سے دوچار ہے، وہیں ہندوستان استحکام اور حساسیت (ہمدردی) کی علامت بن کر اُبھر رہا ہے۔

وزیراعظم نے کہا: "ہم جلد ہی دنیا کی تیسری سب سے بڑی معیشت بننے کے راستے پر گامزن ہیں۔ انہوں نے یہ بھی کہا کہ شہریوں کی سب سے اہم ذمہ داری اپنے فرائض کی ادائیگی ہے۔ انہوں نے عوام سے اپیل کی: "ہم سب مقامی مصنوعات کو اپنائیں اور فخر سے کہیں – یہ 'میک ان انڈیا' ہے۔ آئیے ‘ایک ہندوستان، شریشٹھ ہندوستان’ کے جذبے کو فروغ دیں۔ تمام زبانوں کا احترام کریں، صفائی رکھیں۔

مزید کہا: آئیے ہم اپنی صحت کو ترجیح دیں۔ اپنے کھانے میں تیل کا استعمال 10 فیصد کم کریں اور یوگا کو اپنائیں۔ یہ تمام اقدامات ہمیں تیز رفتار ترقی یافتہ ہندوستان کی طرف لے جائیں گے۔" آخر میں، وزیراعظم نے کہا: دیوالی ہمیں یہ بھی سکھاتی ہے کہ جب ایک دیا دوسرے دیے کو روشن کرتا ہے تو اس کی روشنی کم نہیں ہوتی بلکہ بڑھ جاتی ہے۔ اسی جذبے کے ساتھ، آئیے اس دیوالی پر ہم اپنے معاشرے اور اردگرد محبت، تعاون اور مثبتیت کے دیے جلائیں۔