کولکاتہ: وزیر اعظم نریندر مودی نے جمعہ کو کولکاتہ میں تین نئے میٹرو ریل راستوں کا افتتاح کیا، جن میں نیٹاجی سبھاش چندر بوس بین الاقوامی ہوائی اڈے کے لیے براہِ راست میٹرو سروس بھی شامل ہے۔ وزیر اعظم کے ہمراہ مغربی بنگال کے گورنر سی وی آنند بوس، بی جے پی کے ریاستی صدر سُمِک بھٹاچاریہ اور مرکزی وزیر سُکانت مجمدار بھی موجود تھے۔
یہ 13.61 کلومیٹر طویل نیٹ ورک 'گرین'، ییلو' اور اورنج لائنوں پر مشتمل ہے، جو 1984 میں شروع ہونے والی کولکاتا میٹرو سروس کی ایک اہم پیش رفت ہے۔ حکام کا کہنا ہے کہ ان نئے راستوں کی مدد سے کولکاتا کی سڑکوں پر ٹریفک کا دباؤ کم ہوگا اور لاکھوں افراد کے روزمرہ سفر میں آسانی پیدا ہوگی۔
اس دوران وزیر اعظم نریندر مودی نے کہا: آج ایک بار پھر مجھے مغربی بنگال کی ترقی کو رفتار دینے کا موقع ملا۔ کولکاتا کے عوام خوش ہیں کہ شہر کا پبلک ٹرانسپورٹ نظام ترقی کر رہا ہے۔ میں کولکاتا کے لوگوں کو ان ترقیاتی منصوبوں کے لیے دل سے مبارکباد دیتا ہوں۔
Kolkata, West Bengal: PM Narendra Modi says, "Kolkata holds a prosperous identity in both the history and future of India. Today, as India moves ahead to become the world’s third-largest economy, Dum Dum, Kolkata plays a significant role among these cities…" pic.twitter.com/9V9NVJMgDG
— IANS (@ians_india) August 22, 2025
مودی نے کہا کہ آج جب ہندوستان دنیا کی تیسری سب سے بڑی معیشت بننے کی جانب بڑھ رہا ہے، تو دم دم، کولکاتہ کا کردار اور بھی اہم ہو جاتا ہے... یہ پروگرام اس بات کا ثبوت ہے کہ آج کا ہندوستان ہر شہر کی ترقی کے لیے کام کر رہا ہے۔
ہر شہر میں گرین موبیلٹی (ماحولیاتی طور پر دوستانہ ٹرانسپورٹ) کی کوششیں کی جا رہی ہیں؛ الیکٹرک چارجنگ پوائنٹس اور الیکٹرک بسوں کی تعداد بڑھائی جا رہی ہے... میٹرو نیٹ ورک کو وسعت دی جا رہی ہے، اور سب کو اس بات پر فخر ہے کہ ہندوستان دنیا کا تیسرا سب سے بڑا میٹرو نیٹ ورک رکھنے والا ملک ہے۔
