نئی دہلی: وزیر اعظم نریندر مودی نے ہفتہ کو سرکاری اور نجی شعبوں میں روزگار پیدا کرنے سے متعلق اپنی حکومت کی کوششوں کو اجاگر کرتے ہوئے کہا کہ گزشتہ 11 برسوں میں ملک نے ہر شعبے میں ترقی کی ہے۔

وزیر اعظم نے 51 ہزار سے زائد تقرری نامے تقسیم کرنے کے بعد ایک پروگرام سے ڈیجیٹل طور پر خطاب کرتے ہوئے کہا کہ ان کی حکومت کی فلاحی اسکیموں جیسے کہ غریبوں کے لیے چار کروڑ سے زیادہ مکانات کی تعمیر، 10 کروڑ سے زائد ایل پی جی کنکشن کی تقسیم، اور گھروں کی چھتوں پر سولر پینلز کی تنصیب نے لاکھوں نئے روزگار کے مواقع پیدا کیے ہیں۔

وزیر اعظم مودی نے بتایا کہ گزشتہ دس سال میں 25 کروڑ سے زائد افراد کو غربت سے نکالا گیا۔ اُن کے مطابق اگر روزگار اور آمدنی کے ذرائع نہ ہوتے تو یہ ممکن نہ ہوتا۔ انہوں نے کہا کہ یہ وہ لوگ تھے جن کی زندگی پہلے بےحد دشوار تھی، لیکن آج وہ اتنے خودمختار ہو چکے ہیں کہ غربت کو شکست دے چکے ہیں۔ انہوں نے کہا کہ اُن کی حکومت کی پالیسیوں کے نتیجے میں مینوفیکچرنگ کے شعبے کو بڑا فروغ ملا ہے۔

الیکٹرانک مینوفیکچرنگ میں گزشتہ 11 برسوں میں پانچ گنا اضافہ ہوا ہے، اور جہاں پہلے موبائل بنانے کی صرف 2 سے 4 اکائیاں تھیں، اب ان کی تعداد تقریباً 300 ہو چکی ہے۔ وزیر اعظم نے ’آپریشن سندور‘ کے بعد ملک کی دفاعی صلاحیت پر فخر کا اظہار کرتے ہوئے دفاعی پیداوار پر بھی روشنی ڈالی۔ اُن کے مطابق بھارت کی دفاعی پیداوار 1.25 لاکھ کروڑ روپے سے تجاوز کر چکی ہے۔

انہوں نے اپنے حالیہ پانچ ملکی دورے کا ذکر کرتے ہوئے کہا کہ آج دنیا بھارت کی آبادی اور جمہوریت کی طاقت کو تسلیم کر رہی ہے۔ اُن کے مطابق نوجوان بھارت کی سب سے بڑی طاقت اور روشن مستقبل کی ضمانت ہیں۔ روزگار میلہ کے تحت جاری تقرری ناموں کا حوالہ دیتے ہوئے کہا گیا کہ یہ میلہ نوجوانوں کو بااختیار بنانے اور قوم کی تعمیر میں ان کی شمولیت کے لیے ایک مؤثر موقع فراہم کرتا ہے۔ اب تک ان روزگار میلوں کے ذریعے 10 لاکھ سے زائد تقرری نامے جاری کیے جا چکے ہیں۔