نئی دہلی: وزیر اعظم نریندر مودی نے منگل کو قومی جمہوری اتحاد (این ڈی اے) کے ارکانِ پارلیمنٹ سے کہا کہ وہ خود کو ملک کی خدمت کے لیے وقف کریں، عوام کے درمیان جائیں اور حکومت کی کامیابیوں کو لوگوں تک پہنچائیں۔ این ڈی اے پارلیمانی اجلاس کے بعد بی جے پی کے قومی جنرل سکریٹری ترون چغ نے صحافیوں سے کہا کہ وزیر اعظم نے زور دیا کہ ’’سب سے پہلے ملک ہے‘‘ اور تمام ارکانِ پارلیمنٹ کو ملک کی ترقی اور خوشحالی کے لیے کام کرنے کی تلقین کی۔

ترون چغ نے کہا کہ وزیر اعظم نے این ڈی اے کے تمام ارکان سے اپیل کی کہ وہ اپنی زندگی کا ہر لمحہ ملک کی فلاح کے لیے وقف کریں۔ ان کے مطابق، ملک کی ترقی اور خوشحالی ہی سب سے بڑی ترجیح ہونی چاہیے۔ انہوں نے بتایا کہ وزیر اعظم نے عالمی سطح پر ہندوستان کی بڑھتی ہوئی ساکھ کا بھی ذکر کیا اور کہا کہ ہندوستانی نوجوان پوری دنیا میں اپنی صلاحیتوں کا لوہا منوا رہے ہیں۔

مودی کے حوالے سے انہوں نے کہا، ’’آج پوری دنیا ہندوستان کے نوجوانوں کی آواز سن رہی ہے۔ ہمارا ملک پہلے سے زیادہ تیزی سے ترقی کر رہا ہے۔ چاہے معیشت ہو، دفاعی پالیسی ہو یا عوامی فلاح کی اسکیمیں، دنیا بھر میں ان کی تعریف کی جا رہی ہے۔ مختلف ممالک کے ساتھ ہونے والے معاہدے ہندوستان کو ترقی کی نئی منزلوں تک لے جائیں گے۔‘‘

ترون چغ نے کہا کہ وزیر اعظم کی قیادت میں این ڈی اے کے کارکن ’’وکست ہندوستان‘‘ (ترقی یافتہ ہندوستان) کے عزم کے ساتھ کام کر رہے ہیں۔ بی جے پی کے رکن پارلیمنٹ ششانک منی ترپاٹھی نے کہا کہ وزیر اعظم نے قومی مفاد پر زور دیتے ہوئے ارکان کو ہدایت دی کہ وہ عوام سے مسلسل رابطے میں رہیں۔

انہوں نے کہا کہ وزیر اعظم نے نوجوانوں کے جوش و جذبے اور ملک کی کامیابیوں کا ذکر کیا اور کہا کہ ہندوستان کی کامیابیاں ملک اور بیرونِ ملک نمایاں اثر چھوڑ رہی ہیں۔ ترپاٹھی کے مطابق، وزیر اعظم نے ارکانِ پارلیمنٹ سے کہا کہ وہ عوام کے درمیان جائیں اور ان سے مضبوط رابطہ قائم رکھیں۔

انہوں نے کہا کہ اس رہنمائی کے بعد تمام ارکان نئے جذبے کے ساتھ کام کریں گے۔ بی جے پی رکن پارلیمنٹ کنگنا رناوت نے کہا کہ وزیر اعظم نے نوجوانوں کو درپیش چیلنجز کا ذکر کیا اور ارکان کو ان سے جڑ کر مسائل کے حل کی کوشش کرنے کی ہدایت دی۔

انہوں نے کہا، ’’وزیر اعظم نے کہا کہ ہمیں اپنی کامیابیوں، جیسے سائنس اور ہائیڈروجن ٹرین جیسے منصوبوں کے بارے میں زیادہ سے زیادہ بات کرنی چاہیے۔ انہوں نے اس بات پر بھی تشویش ظاہر کی کہ ان کامیابیوں کا مناسب انداز میں ذکر نہیں ہو رہا۔‘‘ کنگنا نے بتایا کہ وزیر اعظم نے 15 اگست کو یومِ آزادی کی تقریبات کی تیاریوں پر بھی گفتگو کی۔

پیر کو پارلیمنٹ کے قریب کاکروچ جنتا پارٹی (سی جے پی) کے احتجاج سے متعلق سوال پر کنگنا رناوت نے کہا کہ صورتحال کافی کشیدہ تھی۔ انہوں نے کہا، ’’آپ سب نے دیکھا کہ ارکانِ پارلیمنٹ کتنے فکرمند تھے۔ پارلیمنٹ کے دروازے بند کر دیے گئے تھے اور کوئی باہر نہیں جا سکتا تھا۔

بھیڑ نے حملہ کرنے کی کوشش کی، جس سے کئی ارکان خوفزدہ ہوگئے تھے۔‘‘ انہوں نے دہلی پولیس کی تعریف کرتے ہوئے کہا کہ پولیس اہلکاروں نے خود پتھر اور چوٹیں برداشت کیں، ارکانِ پارلیمنٹ کی حفاظت کی اور اس بات کو یقینی بنایا کہ عوام کو کوئی نقصان نہ پہنچے۔