پونے/ آواز دی وائس
مہاراشٹر کے نائب وزیر اعلیٰ ایکناتھ شندے نے ہفتے کے روز پونے میں منعقدہ ’سودیشی 4جی نیٹ ورک‘ کے افتتاحی تقریب میں خطاب کرتے ہوئے وزیر اعظم نریندر مودی کی دور اندیشی اور مضبوط عزم کی تعریف کی اور کہا کہ وزیر اعظم مودی نے ہندوستان کی پہچان کو وشوگرو (عالمی رہنما) کے طور پر قائم کیا ہے۔
اس موقع پر خطاب کرتے ہوئے نائب وزیر اعلیٰ شندے نے کہا کہ آج کا دن ایک عظیم قدم کہا جائے گا۔ یہ خود انحصاری کی طرف ایک اور اہم پیش رفت ہے اور صنعتی انقلاب کی جانب ایک بڑا قدم ہے۔ اس کا سہرا وزیر اعظم کی بصیرت اور پختہ عزم کو جاتا ہے۔ وزیر اعظم نے ہندوستان کی شناخت وِشوگرو (عالمی رہنما) کے طور پر قائم کی ہے۔
مہاراشٹر کے نائب وزیر اعلیٰ نے اس موقع پر بھارت سنچار نگم لمیٹڈ (بی ایس این ایل) کے تمام عہدیداروں کو مبارکباد پیش کی اور مرکزی وزیر مواصلات جیوترادتیہ سندھیا اور ان کی ٹیم کو ان کی کامیابیوں پر نیک خواہشات دیں۔
شندے نے مزید کہا کہ میں بی ایس این ایل کے تمام افسران کو مبارکباد دیتا ہوں جو اس انقلاب کا پرچم اپنے کندھوں پر اٹھائے آگے بڑھ رہے ہیں۔ ہمیں خوشی ہے کہ بی ایس این ایل ترقی کی طرف گامزن ہے، جو کبھی خسارے میں چل رہا تھا... ان کامیابیوں پر جیوترادتیہ سندھیا اور ان کی ٹیم کو بھی نیک تمنائیں۔
کانگریس پارٹی پر حملہ کرتے ہوئے شندے نے کہا کہ جو کام کانگریس کے 60 سالہ دور حکومت میں نہیں ہوا، وہ پچھلے 10 برسوں میں مکمل ہو گیا ہے۔ کئی ترقیاتی کام ہوئے ہیں اور آنے والے 10 برسوں میں مزید ایسے کام ہوں گے، جو پہلے نہیں ہو سکے تھے۔
انہوں نے یقین دہانی کرائی کہ ہندوستان بتدریج 2047 تک ایک ترقی یافتہ ملک بننے کی طرف بڑھ رہا ہے۔
انہوں نے کہا کہ قدم بہ قدم ہم آگے بڑھ رہے ہیں تاکہ ہندوستان کو 2047 تک ایک ترقی یافتہ ملک بنایا جا سکے۔ میں یقین دلاتا ہوں کہ وزیر اعلیٰ دیویندر فڑنویس کی قیادت میں مہاراشٹر بھی اس سفر کا ایک فعال حصہ رہے گا۔
آج ہی اس سے قبل، ہندوستان کے ٹیلی کام سیکٹر کے لیے ایک تاریخی لمحہ رہا جب بی ایس این ایل کے شاندار 25 برس مکمل ہونے پر وزیر اعظم مودی نے ملک کے مکمل طور پر دیسی تیار شدہ 4جی اسٹیک اور 97,500 سے زائد بی ایس این ایل ٹاورز کا جھارسوگڑا سے افتتاح کیا۔ یہ بی ایس این ایل ٹاورز اڈیشہ، آندھرا پردیش، اتر پردیش، مہاراشٹر، راجستھان، آسام، گجرات اور بہار میں نصب کیے گئے ہیں۔
