احمد آباد/ آواز دی وائس

احمد آباد ہوائی حادثے کے سلسلے میں پولیس کمشنر جی ایس ملک نے ایک بڑا بیان جاری کیا ہے۔ پولیس کمشنر نے بتایا کہ حادثے کی تفتیش پولیس اپنی سطح پر بھی کر رہی ہے، لیکن دیگر ایجنسیاں اور ماہرین بھی تکنیکی پہلوؤں سے جانچ کر رہے ہیں، جیسے کہ بلیک باکس کا تجزیہ کیا جا رہا ہے اور تحقیقات تاحال جاری ہیں۔ اب تک 222 افراد کی شناخت ہو چکی ہے، جن میں سے 214 افراد کی شناخت ڈی این اے کے ذریعے کی گئی ہے، جبکہ 8 افراد کی شناخت بغیر ڈی این اے کے ممکن ہوئی ہے اور ان کی لاشیں ورثا کے حوالے کر دی گئی ہیں۔

وشواس کے تعلق سے پولیس کا بیان

پولیس کمشنر نے ہوائی حادثے میں زندہ بچ جانے والے وشواس کے بارے میں کہا کہ اس کا بیان لیا گیا ہے اور اس کا موبائل فون بھی چیک کیا گیا ہے۔ اسے ہمدردی کی بنیاد پر سنبھالا گیا ہے۔

۔2-3 دن میں اموات کا درست اعداد و شمار سامنے آئیں گے

پولیس کمشنر نے بتایا کہ اس حادثے میں اموات کی درست تعداد آئندہ 2-3 دن میں واضح ہو سکے گی۔ انہوں نے یہ بھی کہا کہ حادثے کے مقام سے ملبے میں سے تقریباً 100 موبائل فون برآمد ہوئے ہیں جن کی جانچ جاری ہے۔ اس سلسلے میں بوئنگ کے ماہرین کی بھی مدد لی جا رہی ہے۔

۔70 تولہ سونا ملا

اسی دوران ایک کاروباری شخص راجیش پٹیل نے دعویٰ کیا کہ ریسکیو آپریشن میں مدد کے دوران انہیں ملبے سے تقریباً 70 تولہ سونا اور تقریباً 70 ہزار روپے نقدی ملی، جو انہوں نے سرکاری حکام کے حوالے کر دی۔ راجیش پٹیل نے بتایا کہ حادثہ ان کے گھر سے صرف 300 میٹر کی دوری پر پیش آیا۔ ہم اپنے پڑوسی ڈاکٹر کی ایمبولینس میں جائے حادثہ پر پہنچے... جب ہم وہاں پہنچے تو کچھ بھی صاف نظر نہیں آ رہا تھا۔

آگ کی وجہ سے آنکھیں جلنے لگیں

راجیش پٹیل نے مزید کہا کہ چاروں طرف پٹرول اور آگ کے سبب ہماری آنکھیں جلنے لگیں اور دھوئیں کی وجہ سے اندر جانا ممکن نہیں تھا۔ جب آگ بجھ گئی تو ہم جائے حادثہ کے قریب پہنچے اور دیکھا کہ ہر جگہ لاشیں بکھری ہوئی تھیں۔ ہم نے اُن لوگوں کو تلاش کرنے کی کوشش کی جو ممکنہ طور پر زندہ ہوں، تاکہ انہیں اسپتال لے جایا جا سکے، لیکن منظر ایسا تھا کہ یہ واضح تھا کہ شاید ہی کوئی زندہ بچا ہو۔ پورا جہاز کا ملبہ اور لاشیں ایک ڈھیر میں تبدیل ہو چکے تھے۔

"ہت سارے زیورات ملے

انہوں نے بتایا کہ ہم نے پرانے ساڑیوں، دوپٹوں اور گیہوں کے تھیلوں کا استعمال کر کے لاشوں کو اکٹھا کرنے میں مدد کی۔ تمام لاشیں جمع کرنے کے بعد ہم نے سوچا کہ جب ہم کسی کو بچا نہیں سکے، تو کم از کم ان کے سامان کا خیال رکھنا چاہیے۔ ہمیں ملبے میں برطانوی پاسپورٹ، ہندوستانی پاسپورٹ، جلے ہوئے موبائل فون، لیپ ٹاپ اور آئی پیڈ ملے۔ ہمیں ایک مسافر کا موبائل ابھی بھی آن ملا، جس کی اسکرین ٹوٹی ہوئی تھی اور فون کام نہیں کر رہا تھا۔ ہمیں بہت سارے زیورات بھی ملے۔ 70-80 تولہ سونا۔ ہم نے یہ سب وہاں موجود حکام کے حوالے کر دیا۔