نئی دہلی

مشرقِ وسطیٰ میں جاری جنگ کے بعد پیدا ہونے والی صورتحال پر حکومت نے عوام سے اپیل کی ہے کہ گھبرانے کی کوئی ضرورت نہیں ہے۔ ملک میں ایندھن کی وافر مقدار موجود ہے اور پیٹرول و ڈیزل کی قیمتوں میں کوئی اضافہ نہیں ہوا ہے۔ عوام سے کہا گیا ہے کہ گھبراہٹ میں آ کر پیٹرول اور ڈیزل کی خریداری نہ کریں۔

پیٹرولیم وزارت کی جوائنٹ سیکریٹری سجاتا شرما نے کہا کہ ملک میں خام تیل کا کافی ذخیرہ موجود ہے۔ ہمارے پاس پیٹرول اور ڈیزل کی بھی وافر مقدار ہے اور کہیں کوئی کمی نہیں ہے۔ انہوں نے کہا کہ گھبراہٹ میں خریداری سے بچیں کیونکہ قیمتوں میں کوئی اضافہ نہیں ہوا۔ 100 فیصد پی این جی اور 100 فیصد سی این جی کی سپلائی جاری ہے۔ انہوں نے مزید بتایا کہ کل پیٹرولیم وزارت نے ایک سرکاری نوٹیفکیشن جاری کیا ہے اور حکومت پی این جی کے پھیلاؤ پر کام کر رہی ہے۔ اب تک 2.5 لاکھ نئے پی این جی کنکشن رجسٹر ہو چکے ہیں جبکہ 2.20 لاکھ صارفین ایل پی جی سے پی این جی پر منتقل ہو چکے ہیں۔

دوسری جانب وزارتِ خارجہ کے ترجمان رندھیر جیسوال نے کہا کہ کل وزیر اعظم نریندر مودی نے امریکی صدر ڈونلڈ ٹرمپ سے بات چیت کی، جس میں مشرقِ وسطیٰ کی موجودہ صورتحال پر تبادلہ خیال کیا گیا۔ وزیر اعظم نے کشیدگی کم کرنے اور آبنائے ہرمز کو کھلا رکھنے کی ضرورت پر زور دیا۔ انہوں نے یہ بھی بتایا کہ وزیر اعظم کو کل سری لنکا کے صدر کا بھی فون آیا تھا۔

ایڈیشنل سیکریٹری (خلیج) اسیم مہاجن نے بتایا کہ مشرقِ وسطیٰ سے ہندوستان آنے والی پروازوں کی صورتحال میں بہتری آ رہی ہے۔ 28 فروری سے اب تک 4.26 لاکھ ہندوستانی واپس آ چکے ہیں اور آج تقریباً 80 پروازوں کی توقع ہے۔