نئی دہلی: یونائیٹڈ ڈاکٹرز فرنٹ (UDF) نے سپریم کورٹ آف انڈیا سے رجوع کرتے ہوئے نیشنل ٹیسٹنگ ایجنسی (NTA) کو اس کی موجودہ شکل میں تحلیل کرنے کی درخواست دائر کی ہے۔ یہ درخواست NEET-UG 2026 کے مبینہ پرچہ لیک اسکینڈل اور امتحان کی بعد ازاں منسوخی کے تناظر میں دائر کی گئی ہے۔

درخواست آئین ہند کے آرٹیکل 32 کے تحت دائر کی گئی ہے، جس میں الزام لگایا گیا ہے کہ NEET-UG 2026 کے انعقاد میں "منظم اور تباہ کن ناکامی" ہوئی ہے، اور امتحانی نظام میں بنیادی اصلاحات کا مطالبہ کیا گیا ہے۔ یہ پٹیشن ایڈووکیٹ آن ریکارڈ رِتو رینیوال اور ایڈووکیٹ مہندر کماروت کے ذریعے دائر کی گئی ہے۔

اس میں مطالبہ کیا گیا ہے کہ مرکزی حکومت کو ہدایت دی جائے کہ وہ موجودہ نیشنل ٹیسٹنگ ایجنسی (جو سوسائٹیز رجسٹریشن ایکٹ 1860 کے تحت کام کرتی ہے) کو ختم کرے اور اس کی جگہ پارلیمنٹ کے ذریعے ایک قانونی (اسٹیٹوٹری) قومی امتحانی ادارہ قائم کرے۔ درخواست میں یہ بھی مطالبہ کیا گیا ہے کہ حکومت ایک ایسا نیا قانون لائے جس کے تحت شفافیت، قانونی اختیارات اور پارلیمنٹ کے سامنے براہِ راست جوابدہی رکھنے والا امتحانی ادارہ تشکیل دیا جائے۔

مزید یہ بھی کہا گیا ہے کہ سپریم کورٹ کی نگرانی میں ایک کمیٹی بنائی جائے جو آئندہ قومی امتحانات کی نگرانی کرے اور "صفر لیک شفافیت" کو یقینی بنائے۔ درخواست کے مطابق NEET-UG 2026، جو 3 مئی کو تقریباً 22.7 لاکھ امیدواروں کے لیے منعقد ہوا تھا، ایک منظم "گِیس پیپر" ریکیٹ کے ذریعے متاثر ہوا، جو مبینہ طور پر واٹس ایپ اور ٹیلیگرام گروپس کے ذریعے مختلف ریاستوں میں پھیلایا گیا۔

اس میں راجستھان اسپیشل آپریشن گروپ (SOG) کی تحقیقات اور بعد میں سی بی آئی کی ایف آئی آر کا حوالہ دیتے ہوئے کہا گیا ہے کہ امتحان کی شفافیت مجموعی طور پر متاثر ہوئی۔ درخواست میں دعویٰ کیا گیا ہے کہ بایومیٹرک تصدیق، GPS ٹریکنگ اور AI کیمروں جیسے حفاظتی اقدامات کے باوجود امتحانی مواد امتحان سے تقریباً 42 گھنٹے پہلے لیک ہو گیا تھا۔ مزید کہا گیا ہے کہ بعد ازاں NEET-UG 2026 کی منسوخی خود اس بات کا ثبوت ہے کہ حکام کے مطابق اصل امیدواروں اور لیک سے فائدہ اٹھانے والوں میں فرق کرنا ممکن نہیں رہا۔ UDF نے دلیل دی ہے کہ NTA ایک رجسٹرڈ سوسائٹی ہونے کی وجہ سے اس میں جوابدہی کا خلا موجود ہے کیونکہ یہ UPSC یا SSC جیسے آئینی یا قانونی اداروں کی

طرح پارلیمنٹ کو براہ راست جوابدہ نہیں ہے۔ درخواست میں آئین کے آرٹیکل 14 اور 21 کی خلاف ورزی کا بھی ذکر کیا گیا ہے، اور کہا گیا ہے کہ بار بار ہونے والے پیپر لیک میرٹ پر مبنی انتخاب کے نظام کو نقصان پہنچاتے ہیں اور طلبہ میں شدید ذہنی دباؤ اور غیر یقینی صورتحال پیدا کرتے ہیں۔ درخواست میں سپریم کورٹ کے 2024 کے NEET تنازع سے متعلق مشاہدات اور کے۔ رادھاکرشنن کمیٹی کی سفارشات کا بھی حوالہ دیا گیا ہے، جن میں مزید سخت حفاظتی اقدامات، آؤٹ سورسنگ میں کمی اور کمپیوٹر بیسڈ امتحانی نظام کی طرف منتقلی کی تجویز دی گئی تھی۔