نئی دہلی: دہلی ہائی کورٹ نے جنتر منتر پر امتحانات میں مبینہ بے ضابطگیوں کے خلاف کاکروچ جنتا پارٹی (کاجپا) کی قیادت میں جاری احتجاج کی تحقیقات کے مطالبے پر دائر مفادِ عامہ کی درخواست (پی آئی ایل) پر جمعہ کو سماعت کرنے پر رضامندی ظاہر کر دی۔ درخواست گزار کے وکیل ورون کمار سنہا نے چیف جسٹس ڈی کے اپادھیائے اور جسٹس تیجس کریا پر مشتمل بنچ کے سامنے درخواست کا ذکر کرتے ہوئے معاملہ جمعہ کو سماعت کے لیے مقرر کرنے کی استدعا کی۔ انہوں نے کہا، ’’یہ نام نہاد طلبہ تحریک کے خلاف درخواست ہے۔
انہوں نے پوری دہلی کو یرغمال بنا رکھا ہے، سڑکیں بند کر دی گئی ہیں اور شہری شدید مشکلات کا سامنا کر رہے ہیں۔‘‘ چیف جسٹس نے جواب دیا، ’’ٹھیک ہے، کل اس کی سماعت کریں گے۔‘‘ درخواست گزار اور اکھل بھارت ہندو مہاسبھا کے سابق نائب صدر ستیش کمار اگروال نے اپنی درخواست میں مؤقف اختیار کیا ہے کہ کارکنوں، سیاسی رہنماؤں اور مبینہ طور پر غیر ملکی فنڈنگ حاصل کرنے والی تنظیموں کی شمولیت نے احتجاج کی ’’حقیقی نوعیت، مقصد اور اہداف‘‘ پر سنگین سوالات کھڑے کر دیے ہیں۔
درخواست میں کہا گیا ہے کہ مختلف سیاسی جماعتوں کے رہنما اور کارکن احتجاج میں شریک ہوئے، جس کے باعث طلبہ کی تحریک ایک سیاسی تحریک میں تبدیل ہو گئی۔ درخواست گزار نے الزام لگایا کہ احتجاج کے دوران ایمبولینس سمیت عوامی آمدورفت میں رکاوٹ ڈالی گئی، سرکاری و نجی املاک کو نقصان پہنچایا گیا، صحافیوں پر حملے ہوئے، پارلیمنٹ کے قریب سکیورٹی میں خلل ڈالنے کی کوشش کی گئی اور پولیس و دیگر سرکاری اہلکار زخمی ہوئے۔
درخواست میں عدالت سے استدعا کی گئی ہے کہ ان واقعات پر ایف آئی آر درج کرنے، غیر جانبدار اور جامع تحقیقات کرانے، اور ضرورت پڑنے پر قومی تحقیقاتی ایجنسی (این آئی اے) یا کسی دوسری مناسب خصوصی ایجنسی سے تحقیقات کرانے کے احکامات جاری کیے جائیں۔
واضح رہے کہ کاجپا 20 جون سے امتحانی بے ضابطگیوں کے خلاف اور مرکزی وزیرِ تعلیم دھرمیندر پردھان کے استعفے کے مطالبے پر احتجاج کر رہی ہے۔ 20 جولائی کو ’’پارلیمنٹ چلو‘‘ مارچ میں ہزاروں افراد نے شرکت کی تھی۔ بدھ کو دہلی ہائی کورٹ نے اسی مارچ کے دوران مظاہرین پر مبینہ حد سے زیادہ طاقت کے استعمال سے متعلق دائر مفادِ عامہ کی درخواستوں پر مرکزی حکومت اور دہلی پولیس سے جواب طلب کیا تھا۔ عدالت نے پولیس کارروائی سے متعلق تمام اہم ریکارڈ، بشمول سی سی ٹی وی فوٹیج اور دیگر ویڈیوز، محفوظ رکھنے کی بھی ہدایت دی تھی۔
