ممبئی : دنیا بھر میں لندن کی میٹروپولیٹن پولیس (اسکاٹ لینڈ یارڈ) کے بعد ممبئی پولیس کو دوسری بہترین پولیس فورس سمجھا جاتا ہے، لیکن ہندوستان کی اقتصادی راجدھانی ممبئی سے ایک حیران کن حقیقت سامنے آئی ہے۔ ریاست مہاراشٹر کے وزیراعلیٰ اور وزیر داخلہ دیویندر فڈنویس نے بتایا ہے کہ سال 2022 سے جون 2025 کے درمیان ممبئی پولیس کے 427 افسران اور اہلکاروں کی موت ہو چکی ہے۔

ان میں سے 25 نے خودکشی کی، 75 کی موت دل کے دورے سے ہوئی جبکہ 6 افراد کینسر کے سبب انتقال کر گئے۔ وزیراعلیٰ نے مہاراشٹر کی ودھان پریشد میں دیے گئے ایک جواب میں بتایا کہ ان پولیس اہلکاروں کی موت کے معاملے میں کسی قسم کی تفتیش نہیں کی گئی، کیونکہ ان کے رشتہ داروں نے کسی بھی طرح کا شک یا اعتراض ظاہر نہیں کیا۔

انہوں نے کہا کہ ریاستی حکومت کی 150 روزہ منصوبہ بندی کے تحت ان اہلکاروں کے اہل خانہ کو ہمدردانہ تقرری کے ذریعے نوکری دینے کے تمام معاملات کو مشن موڈ میں حل کیا جائے گا۔ اس حوالے سے تمام محکموں کو ضروری احکامات جاری کیے جا چکے ہیں۔ یہ جواب انہوں نے شیوسینا (ادھو گروپ) کے رکن اسمبلی سنیل شنڈے کے سوال کے جواب میں دیا۔ وزیراعلیٰ نے مزید کہا کہ ممبئی پولیس میں اب 8 گھنٹے کی ڈیوٹی کا تصور رائج کر دیا گیا ہے۔

حالانکہ تہواروں یا ہنگامی حالات میں ڈیوٹی کا وقت بڑھایا جا سکتا ہے، لیکن عمومی طور پر اہلکار اب مقررہ 8 گھنٹے کی ڈیوٹی پر مامور ہوتے ہیں۔ ساتھ ہی پولیس اہلکاروں کو ہفتہ وار چھٹیاں دینا بھی شروع کر دیا گیا ہے۔ حکومت نے 40 سال سے زائد عمر کے پولیس اہلکاروں کے لیے سال میں ایک بار اور 50 سال سے زائد عمر والوں کے لیے سال میں دو بار طبی معائنے کو لازمی قرار دیا ہے۔

اس کے علاوہ 40 قسم کی بیماریوں کا مفت علاج فراہم کیا جا رہا ہے۔ اس مقصد کے لیے ریاست کے 270 اسپتالوں کے ساتھ مفاہمتی یادداشت پر دستخط کیے گئے ہیں۔ کینسر کی جانچ کے لیے ٹاٹا میموریل اور اے کے مہتا اسپتال کے ساتھ خصوصی کیمپ بھی لگائے جا رہے ہیں۔ وزیراعلیٰ فڈنویس نے مزید اعلان کیا کہ حکومت منشیات فروشوں کے خلاف سخت قانون بنانے پر غور کر رہی ہے۔ انہوں نے کہا کہ ریاست منشیات کے دھندے میں ملوث افراد پر مہاراشٹر منظم جرائم کنٹرول ایکٹ (مکوکا) کے تحت کارروائی کے لیے قانون میں ترمیم کرے گی۔

اس ترمیم کو ریاستی اسمبلی کے موجودہ مانسون اجلاس میں پیش کیا جائے گا۔ یہ اقدامات اس بات کی عکاسی کرتے ہیں کہ حکومت پولیس اہلکاروں کی فلاح و بہبود کے ساتھ ساتھ شہریوں کی سیکیورٹی کو لے کر بھی سنجیدہ ہے۔ تاہم، پولیس اہلکاروں کی بڑھتی ہوئی اموات اور خودکشیوں پر گہری تشویش کا اظہار کیا جا رہا ہے، اور ماہرین کا کہنا ہے کہ ذہنی دباؤ سے نمٹنے کے لیے مزید مؤثر اقدامات کی ضرورت ہے۔