نئی دہلی: سپریم کورٹ نے جمعرات کو مرکزی حکومت کو ہدایت دی کہ قومی اہلیت و داخلہ امتحان (نیٹ) کے پرچہ لیک ہونے کے خلاف جنتر منتر پر طلبہ کے احتجاج کے دوران تعینات ریپڈ ایکشن فورس (آر اے ایف) کے ہتھیاروں کے استعمال کا مکمل ریکارڈ محفوظ رکھا جائے۔

عدالتِ عظمیٰ نے سابق مرکزی اطلاعاتی کمشنر اور انڈین پولیس سروس (آئی پی ایس) کے ریٹائرڈ افسر یشو وردھن آزاد اور پیلٹ لگنے سے زخمی ہونے والے دو افراد کی جانب سے دائر اس عرضی میں کی گئی اس درخواست پر بھی سوال اٹھایا، جس میں قانون و نظم کی صورتحال سے نمٹنے کے لیے دھاتی پیلٹ گنوں کے استعمال پر مکمل پابندی عائد کرنے کی اپیل کی گئی ہے۔

عدالت نے پولیس ریسرچ اینڈ ڈیولپمنٹ بیورو (بی پی آر ڈی) کی سفارشات کا حوالہ دیتے ہوئے کہا کہ غیر معمولی حالات میں پولیس کو پیلٹ گن استعمال کرنے کا اختیار حاصل ہے۔ ہندوستان کے چیف جسٹس سوریہ کانت، جسٹس جوی مالیا باگچی اور جسٹس وی موہنا پر مشتمل بنچ نے سینئر وکیل وریندا گروور کے دلائل پر غور کرتے ہوئے دہلی حکومت کو ہدایت دی کہ نیٹ پرچہ لیک کے خلاف احتجاج کے دوران پیلٹ لگنے سے زخمی ہونے والوں کو بہترین طبی علاج فراہم کیا جائے۔

تاہم بنچ نے واضح کیا کہ وہ 20 جولائی کو کاکروچ جنتا پارٹی (کاجپا) کی قیادت میں ہونے والے احتجاج کے دوران پیلٹ گن کے استعمال کے معاملے کی سماعت کے لیے تیار ہے۔ وریندا گروور کے دلائل کا نوٹس لیتے ہوئے عدالت نے مرکز کی جانب سے پیش ہونے والے سالیسٹر جنرل تشار مہتا کو ہدایت دی کہ جنتر منتر پر احتجاج کے دوران تعینات آر اے ایف کے ہتھیاروں کے استعمال سے متعلق تمام ریکارڈ محفوظ رکھا جائے۔

یشو وردھن آزاد نے اپنی عرضی میں ملک بھر میں ہجوم کو منتشر کرنے کے لیے پمپ ایکشن یا پروجیکٹائل ایکشن گنوں سے داغی جانے والی مکمل یا جزوی دھاتی پیلٹ گولیوں کے استعمال پر پابندی لگانے کا مطالبہ کیا ہے۔ ان کا مؤقف ہے کہ ایسے ہتھیار طاقت کے استعمال سے متعلق آئینی اصولوں کے منافی ہیں۔

آئین کے آرٹیکل 32 کے تحت دائر مفادِ عامہ کی اس عرضی کو آزاد اور دو ایسے افراد نے مشترکہ طور پر دائر کیا ہے، جن کا دعویٰ ہے کہ 20 جولائی کو وسطی دہلی میں منعقدہ "سنسد چلو" احتجاج کے دوران وہ پیلٹ لگنے سے زخمی ہوئے تھے۔ عرضی میں یہ مطالبہ بھی کیا گیا ہے کہ اس واقعے میں مبینہ طور پر زخمی ہونے والے تمام افراد کو مناسب معاوضہ، معیاری طبی سہولت اور بازآبادکاری فراہم کی جائے۔