پٹنہ۔ : بہار اسمبلی انتخابات کے پہلے مرحلے میں جمعرات کی صبح 11 بجے تک کل 27.65 فیصد ووٹروں نے اپنے حق رائے دہی کا استعمال کیا۔ کل 3.75 کروڑ ووٹروں میں سے یہ تعداد سامنے آئی۔ ایک سرکاری اہلکار نے یہ معلومات دی۔اب تک بیگوسرائے ضلع میں سب سے زیادہ 30.37 فیصد ووٹنگ ریکارڈ کی گئی۔ اس کے بعد لکھیسَرائے میں 30.32 فیصد اور گوپال گنج میں 30.04 فیصد ووٹ ڈالے گئے۔

اپوزیشن جماعت آر جے ڈی نے ایکس پر الزام عائد کیا کہ ’’پہلے مرحلے کی ووٹنگ کے دوران مہاگٹھ بندھن کے مضبوط بوتھوں پر جان بوجھ کر بجلی کاٹ کر ووٹنگ کی رفتار کو سست کیا جا رہا ہے۔ جان بوجھ کر ووٹنگ کی رفتار کم کی جا رہی ہے۔ الیکشن کمیشن فوری طور پر اس بدنیتی پر مبنی دھاندلی کا نوٹس لے اور سخت کارروائی کرے۔

بہار کے چیف الیکٹورل آفس نے ان الزامات کو مسترد کرتے ہوئے کہا کہ یہ الزامات مکمل طور پر بے بنیاد اور گمراہ کن ہیں۔ بہار کے تمام پولنگ مراکز پر ووٹنگ پُرامن اور بلا رکاوٹ جاری ہے۔ الیکشن کمیشن آف انڈیا شفاف اور منصفانہ ووٹنگ کو یقینی بنانے کے لیے تمام معیاری طریقہ کار پر عمل کر رہا ہے۔ ایسے گمراہ کن پروپیگنڈے کی کوئی بنیاد نہیں ہے۔بہار کے نائب وزرائے اعلیٰ سمرات چودھری اور وجے کمار سنہا، انڈیا بلاک کے وزیر اعلیٰ کے امیدوار تیجسوی یادو، وی آئی پی پارٹی کے سربراہ مکیش سہانی، مرکزی وزراء گِری راج سنگھ اور راجیو رنجن سنگھ لالن سمیت کئی سرکردہ سیاست دانوں نے ووٹ ڈالے۔

121 اسمبلی نشستوں کے لیے صبح 7 بجے سخت حفاظتی انتظامات کے درمیان ووٹنگ شروع ہوئی جو شام 5 بجے تک جاری رہے گی۔پہلے مرحلے میں کل 3.75 کروڑ ووٹر 1,314 امیدواروں کی قسمت کا فیصلہ کریں گے جن میں نمایاں نام تیجسوی یادو اور بی جے پی کے نائب وزیر اعلیٰ سمرات چودھری کے ہیں۔