پٹنہ: بہار میں بی پی ایس سی ٹی آر ای-4 (BPSC TRE-4) امتحان کی نوٹیفکیشن میں تاخیر کے خلاف احتجاج کرنے والے طلبہ کو منتشر کرنے کے لیے جمعہ کے روز پولیس نے طاقت کا استعمال کیا۔ حکام نے یہ معلومات فراہم کیں۔ پٹنہ کے مرکزی پولیس سپرنٹنڈنٹ دکشا نے کہا: “مظاہرین بیریکیڈنگ توڑنے کی کوشش کر رہے تھے، جس کے بعد انہیں ہٹانے کے لیے ہلکی طاقت کا استعمال کیا گیا۔

” تاہم طلبہ کا الزام ہے کہ پولیس نے ان پر لاٹھی چارج بھی کیا۔ بی پی ایس سی ٹی آر ای-4 کے بڑی تعداد میں امیدواروں نے پٹنہ کالج سے احتجاجی مارچ نکالا تھا اور وہ ڈاک بنگلہ چوراہے کی طرف بڑھ رہے تھے، اسی دوران گاندھی میدان کے قریب پولیس نے انہیں روک لیا۔ بہار میں بی پی ایس سی ٹی آر ای-4 امتحان کے ذریعے 46 ہزار سے زائد آسامیوں پر بھرتی کی توقع ہے، لیکن امتحان کی نوٹیفکیشن اپریل 2026 کی طے شدہ مدت گزرنے کے باوجود جاری نہیں ہو سکی ہے۔