پٹنہ: بہار کے دارالحکومت پٹنہ میں معروف ٹیچر فیصل خان (خان سر) کے کوچنگ ادارے "خان گلوبل کوچنگ انسٹی ٹیوٹ" میں مبینہ توڑ پھوڑ اور پتھراؤ کے معاملے میں پولیس نے تین افراد کو گرفتار کر لیا ہے۔ حکام نے بدھ کو یہ اطلاع دی۔ پولیس کے مطابق گرفتار افراد میں ایک حریف کوچنگ ادارے کا ڈائریکٹر بھی شامل ہے۔

منگل کی رات پٹنہ کے کدم کنواں تھانہ علاقے میں واقع خان گلوبل کوچنگ انسٹی ٹیوٹ پر کچھ شرپسند عناصر نے مبینہ طور پر پتھراؤ کیا اور املاک کو نقصان پہنچایا۔ ابتدائی طور پر خان سر نے دعویٰ کیا تھا کہ ادارے پر فائرنگ بھی کی گئی، تاہم پولیس نے اس کی تصدیق نہیں کی۔ بعد میں خان سر نے کہا کہ تحقیقات مکمل ہونے کے بعد ہی حقیقت سامنے آئے گی۔

پولیس سپرنٹنڈنٹ (شہر) کے دفتر کی جانب سے جاری بیان میں کہا گیا کہ رات تقریباً 10:10 بجے کوچنگ ادارے میں پتھراؤ اور توڑ پھوڑ کی اطلاع ملی، جس کے بعد پولیس فوراً موقع پر پہنچ گئی اور تفتیش شروع کر دی۔ ابتدائی تحقیقات اور سی سی ٹی وی فوٹیج کے جائزے سے معلوم ہوا کہ پٹنہ کے ایک دوسرے کوچنگ ادارے سے وابستہ 15 سے 20 افراد اس واقعے میں ملوث تھے۔

واقعے کے بعد میڈیا سے گفتگو کرتے ہوئے خان سر نے الزام لگایا کہ قریبی کوچنگ ادارے سے وابستہ افراد نے بڑے پیمانے پر نقصان پہنچایا، سیکیورٹی گارڈ کو تشدد کا نشانہ بنایا اور گولیاں بھی چلائیں۔ ان کے مطابق بعض لوگوں کو اس بات پر اعتراض ہے کہ کم فیس میں تعلیم دے کر ان کا ادارہ اچھے نتائج کیسے حاصل کر رہا ہے۔

تاہم پولیس ڈپٹی سپرنٹنڈنٹ راجیش رنجن نے کہا کہ سی سی ٹی وی فوٹیج میں فائرنگ کا کوئی ثبوت نہیں ملا اور کوچنگ ادارے کی تحریری شکایت میں بھی فائرنگ کا ذکر موجود نہیں ہے۔ فوٹیج میں کچھ افراد کو اینٹ پتھر پھینکتے اور ہورڈنگ گراتے دیکھا گیا ہے۔ پولیس نے حریف کوچنگ ادارے کے ڈائریکٹر روشن آنند سمیت چار نامزد اور 15 تا 20 نامعلوم افراد کے خلاف مقدمہ درج کیا ہے۔

روشن آنند، ابھیشیک اور گورو کو گرفتار کر لیا گیا ہے، جبکہ دیگر ملزمان کی تلاش جاری ہے۔ خان گلوبل کوچنگ انسٹی ٹیوٹ کے منیجر کنہیا کمار سنگھ کی شکایت پر بھارتیہ نیائے سنہتا (BNS) کی مختلف دفعات کے تحت ایف آئی آر درج کی گئی ہے۔ گرفتار ملزم روشن آنند نے اپنے اوپر لگائے گئے الزامات کو مسترد کرتے ہوئے کہا کہ انہیں اور ان کے ادارے کو بدنام کرنے کی کوشش کی جا رہی ہے۔

پولیس کا کہنا ہے کہ بظاہر یہ معاملہ کوچنگ اداروں کے درمیان مسابقت اور رقابت کا معلوم ہوتا ہے، تاہم تمام پہلوؤں سے تحقیقات جاری ہیں۔ پولیس نے یہ بھی تصدیق کی کہ ادارے کے سیکیورٹی گارڈ پر حملہ کیا گیا، جس کے نتیجے میں اس کے سر پر چوٹ آئی اور اس وقت اس کا علاج پٹنہ میڈیکل کالج اسپتال (PMCH) میں جاری ہے۔

خان سر نے حکومت کی جانب سے فراہم کی گئی سیکیورٹی پر اطمینان کا اظہار کرتے ہوئے وزیر اعلیٰ سمراٹ چودھری سے درخواست کی کہ ادارے میں زیر تعلیم غریب طلبہ کے مفاد میں حفاظتی انتظامات برقرار رکھے جائیں۔ بہار کے وزیر تعلیم متھیلیش تیواری نے کہا کہ وہ اس معاملے پر ڈی جی پی سے بات کریں گے اور آئندہ ایسی وارداتوں کی روک تھام کے لیے پالیسی تیار کی جائے گی۔ دریں اثنا، جنتا دل (یونائیٹڈ) کے قائد اور راجیہ سبھا رکن سنجے جھا نے کہا کہ ریاستی حکومت مجرموں کے خلاف کسی قسم کی نرمی نہیں برتے گی اور قانون کے مطابق سخت کارروائی کی جائے گی۔