نئی دہلی: پہلگام حملے کے دو ماہ بعد پارلیمانی کمیٹی جائے واردات کا دورہ کر سکتی ہے۔ ذرائع کے مطابق اس دورے میں عملہ، عوامی شکایات، اور قانون و انصاف کی وزارتوں سے وابستہ افراد شامل ہو سکتے ہیں۔ واضح رہے کہ پہلگام میں دہشت گرد حملے کے بعد یہ پارلیمانی کمیٹی کا پہلا دورہ ہوگا۔
ذرائع کے مطابق اب تک جو کچھ طے پایا ہے، اس کے مطابق یہ دورہ 28 جون سے شروع ہو سکتا ہے، تاہم اس پروگرام پر حتمی منظوری ابھی باقی ہے۔ ذرائع کا کہنا ہے کہ اس دورے کے دوران پارلیمانی کمیٹی پہلے جموں پہنچے گی، جہاں اس کے ارکان حکام کے ساتھ میٹنگ کریں گے۔ اس کے بعد کمیٹی کے ارکان ماتا ویشنو دیوی کے درشن کریں گے اور وہاں سے وندے بھارت ایکسپریس کے ذریعے سری نگر روانہ ہوں گے۔ سری نگر میں بھی کمیٹی کی میٹنگ ہوگی۔
اس کے بعد پہلگام میں بیسرن ویلی میں دہشت گرد حملے کی جگہ کا دورہ کیا جائے گا۔ کمیٹی کے ارکان حملے میں ہلاک ہونے والوں کو خراج عقیدت پیش کریں گے۔ واضح رہے کہ اس کمیٹی کے چیئرمین بی جے پی کے رکن پارلیمنٹ بُرِج لال ہیں۔
وہ گزشتہ ہفتے، 4 جون کو وزیر اعظم نریندر مودی کو خط لکھ چکے ہیں، جس میں بیسرن ویلی میں مارے گئے سیاحوں کی یاد میں ایک یادگار (سمارک) بنانے کی تجویز دی گئی تھی۔ غیر ملکی دورے پر جانے والے وفد کے رکن کی حیثیت سے برج لال نے وزیر اعظم سے ملاقات کی تھی اور انہیں اپنے اس مشورے کی یاد دہانی کروائی تھی۔
درحقیقت، "آپریشن سندور" کے دوران غیر ملکی سفر میں ہند نژاد افراد کے ساتھ بات چیت کے دوران یہ تجویز آئی تھی کہ بیسرن ویلی میں ایک یادگار بنائی جانی چاہیے۔ اس کے بعد برج لال نے وزیر اعظم کو خط لکھا۔ برج لال کی صدارت میں قائم پارلیمانی کمیٹی کو پچھلے مہینے جموں و کشمیر کا دورہ کرنا تھا۔ یہ دورہ 9 مئی کو سری نگر سے شروع ہونا تھا، لیکن آپریشن سندور کی وجہ سے اسے ملتوی کر دیا گیا تھا۔
