نئی دہلی :پارلیمنٹ نے ایک ہی دن میں دو اہم بحری بل منظور کر کے بندرگاہوں، جہاز رانی اور آبی گزرگاہوں کی وزارت (MoPSW) کے لیے ایک تاریخی سنگ میل عبور کیا۔ پہلا بل "مرچنٹ شپنگ بل، 2024" ہے جسے لوک سبھا نے منظور کیا، اور دوسرا "کیریج آف گڈز بائے سی بل، 2025" ہے، جو راجیہ سبھا سے منظور ہوا۔ ان دونوں قانون سازی اقدامات کا مقصد ہندوستان میں ایک جدید، موثر اور عالمی معیار کے مطابق میری ٹائم فریم ورک قائم کرنا ہے۔

مرچنٹ شپنگ بل، 2024: ایک جدید اور بین الاقوامی ہم آہنگ قانون

"مرچنٹ شپنگ بل، 2024" 1958 کے پرانے مرچنٹ شپنگ ایکٹ کی جگہ لے گا۔ نیا بل 16 ابواب اور 325 دفعات پر مشتمل ہے، جو کہ بین الاقوامی بحری کنونشنز سے ہم آہنگ ہے اور موجودہ عالمی بحری چیلنجز کے مطابق ہندوستان کے قانونی ڈھانچے کو ازسرِ نو ترتیب دیتا ہے۔

بل کو پیش کرتے ہوئے مرکزی وزیر سربانند سونووال نے کہا:
"یہ بل نہ صرف ایک جدید قانون سازی ہے بلکہ یہ ہندوستان کو عالمی سمندری تجارتی میدان میں ایک رہنما مقام پر پہنچانے کی سمت ایک فیصلہ کن قدم ہے۔ یہ بل حفاظت، ہنگامی ردعمل اور ماحولیاتی تحفظ جیسے کلیدی پہلوؤں کو مضبوط بناتا ہے، جبکہ تعمیل کے بوجھ کو کم کرتا ہے اور کاروبار میں آسانی کو فروغ دیتا ہے۔انہوں نے مزید کہا کہ وزیراعظم نریندر مودی کی قیادت میں گزشتہ 11 برسوں کے دوران کی گئی قانونی اصلاحات نے سمندری شعبے میں شفافیت، کارکردگی اور بین الاقوامی مسابقت میں قابل ذکر اضافہ کیا ہے۔

کیریج آف گڈز بائے سی بل، 2025: نوآبادیاتی قانون کا خاتمہ

راجیہ سبھا میں منظور ہونے والے "کیریج آف گڈز بائے سی بل، 2025" نے 1925 کے نوآبادیاتی دور کے "انڈین کیریج آف گڈز بائے سی ایکٹ" کو منسوخ کر دیا ہے۔ یہ نئی قانون سازی سمندری تجارت کے قانونی فریم ورک کو سادہ، شفاف اور بین الاقوامی معیارات سے ہم آہنگ بنانے کے لیے متعارف کی گئی ہے۔اس بل میں عالمی سطح پر تسلیم شدہ "ہیگ ویزبی رولز" کو اپنایا گیا ہے، جن پر برطانیہ جیسے ترقی یافتہ ممالک عمل پیرا ہیں۔ اس قانون سے توقع کی جا رہی ہے کہ یہ سمندری کارگو کی نقل و حرکت کو زیادہ محفوظ، شفاف اور مؤثر بنائے گا، جبکہ قانونی پیچیدگیوں کو کم کرے گا۔

بل کو راجیہ سبھا میں وزیر مملکت برائے بندرگاہیں و جہاز رانی، شانتنو ٹھاکر نے پیش کیا۔

انہوں نے کہا کہ "اس صدی پرانے نوآبادیاتی قانون کی جگہ جدید قانون سازی کرنا ایک بڑی اصلاحی کوشش کا حصہ ہے تاکہ ہم نوآبادیاتی ذہنیت کی باقیات سے نجات حاصل کریں۔ یہ بل نہ صرف کاروبار کرنے میں آسانی فراہم کرے گا بلکہ مودی حکومت کی پالیسی 'پیچیدگی سے وضاحت کی جانب' کی عملی مثال بھی ہے۔"

وسیع تر دو طرفہ حمایت اور قومی مفاد کی ترجیح

یہ دونوں بل پارلیمنٹ کے دونوں ایوانوں میں وسیع حمایت کے ساتھ منظور کیے گئے، اور یہ بھارت کے سمندری قانونی ڈھانچے کو بین الاقوامی تقاضوں اور مستقبل کی ضروریات سے ہم آہنگ کرنے کی بڑی کوشش کا حصہ ہیں۔ ان قانون سازی اقدامات سے نہ صرف تجارت میں آسانی ہوگی بلکہ ہندوستان کو ایک قابل اعتماد، عالمی سطح پر مسابقتی سمندری معیشت کے طور پر ابھرنے میں مدد ملے گی۔بحث کے دوران اراکین نے سمندری سلامتی، اسمگلنگ اور قانونی تحفظات جیسے مسائل بھی اٹھائے، جن کے حل کی حکومت نے یقین دہانی کرائی۔ان بلوں کی منظوری اس بات کا ثبوت ہے کہ بھارت اپنے سمندری شعبے کو نئے دور کی ضروریات کے مطابق تیار کرنے کے لیے پُرعزم ہے۔