نئی دہلی/ آواز دی وائس
امریکہ کے صدر ڈونالڈ ٹرمپ کا پاکستان سے اچانک اُٹھتا ہوا پیار اب کھل کر سامنے آ رہا ہے۔ ایک طرف ٹرمپ نے ہندوستان پر ٹیرف میزائل داغے ہیں، تو دوسری جانب پاکستان کے آرمی چیف جنرل عاصم منیر دو ماہ میں دوسری بار امریکہ کا دورہ کرنے جا رہے ہیں۔ جنرل منیر، امریکی سینٹرل کمانڈ کے کمانڈر جنرل مائیکل ای. کریلا کی الوداعی تقریب میں شرکت کے لیے امریکہ روانہ ہوں گے۔
جنرل منیر کا یہ دورہ اسلام آباد اور واشنگٹن ڈی سی کے درمیان گہرے ہوتے تعلقات کا اشارہ دیتا ہے۔ یہ دورہ ایسے وقت میں ہو رہا ہے جب ٹرمپ کی ٹیرف پالیسی کی وجہ سے ہندوستان اور امریکہ کے درمیان کشیدگی میں اضافہ دیکھنے کو مل رہا ہے۔ دوسری جانب، ٹرمپ نے پاکستان کے ساتھ تجارتی معاہدے کیے ہیں، جن کے تحت پاکستان پر صرف 19 فیصد ٹیرف عائد کیا گیا ہے اور اس کے تیل کے ذخائر کی تلاش کا منصوبہ بنایا گیا ہے۔
رپورٹ کے مطابق، سرکاری ذرائع نے بتایا ہے کہ ہندوستان سے فوجی تصادم میں شکست کے بعد "فیلڈ مارشل" کا خطاب حاصل کرنے والے عاصم منیر اسی ہفتے امریکہ کا دورہ کریں گے اور وہاں امریکی فوجی افسران کے ساتھ ملاقاتیں بھی کریں گے۔ سینٹکام کے کمانڈر جنرل کریلا نے جولائی کے آخر میں ہی پاکستان کا دورہ کیا تھا اور اب ان کی الوداعی تقریب میں شرکت کے لیے منیر امریکہ جا رہے ہیں۔
جون میں ٹرمپ کے ساتھ منیر نے کیا تھا لنچ
۔18 جون کو امریکی صدر ڈونالڈ ٹرمپ اور جنرل عاصم منیر نے وہائٹ ہاؤس کے اندر ایک ساتھ لنچ کیا تھا۔ اس ملاقات کے بعد ٹرمپ نے کہا تھا کہ منیر سے ملنا ان کے لیے باعثِ فخر ہے۔ یہ پہلا موقع تھا جب کسی امریکی صدر نے بغیر کسی اعلیٰ سول افسر کے، وہائٹ ہاؤس میں پاکستانی فوج کے سربراہ کی میزبانی کی تھی۔
صدر کے سرکاری شیڈول کے مطابق، یہ ملاقات کابینہ روم میں ہوئی، جہاں میڈیا کو داخلے کی اجازت نہیں دی گئی تھی۔
ہندوستان-پاکستان جنگ کے بعد ہوئی ملاقات
سب سے اہم بات یہ ہے کہ جنرل منیر کی یہ ملاقات اس وقت ہوئی تھی جب ہندوستان اور پاکستان کے درمیان چار روز تک جاری رہنے والے فوجی تصادم کو کچھ ہی ہفتے گزرے تھے۔
پاکستانی دہشتگردوں نے پہلگام میں 26 معصوم شہریوں کو بےدردی سے قتل کر دیا تھا، جس کے بعد ہندوستان نے "آپریشن سیندور" چلا کر پاکستانی دہشتگردوں اور انہیں پناہ دینے والی پاکستانی فوج کو منہ توڑ جواب دیا تھا۔ جب پوری دنیا پہلگام کے اس بزدلانہ اور گھناؤنے حملے پر پاکستان کی مذمت کر رہی تھی، اُس وقت صدر ٹرمپ پاکستانی آرمی چیف کے ساتھ لنچ کر رہے تھے۔
امن کے بدلے نوبیل کی امید
صدر ٹرمپ اس لیے بھی خوش تھے کہ پاکستان نے انہیں نوبیل امن انعام کے لیے رسمی طور پر نامزد کیا تھا۔
پاکستان نے ٹرمپ کے اس جھوٹ کی بھی تائید کی تھی کہ ہندوستان اور پاکستان کے درمیان سیزفائر ٹرمپ نے کرایا ہے۔ ٹرمپ نے جنرل منیر کی تعریف کرتے ہوئے کہا تھا کہ میں نے انہیں یہاں اسی لیے بلایا تھا تاکہ میں ان کا شکریہ ادا کر سکوں کہ انہوں نے جنگ روکنے میں مدد کی اور امن قائم کرنے کی کوشش کی۔
.webp "پاک آرمی چیف منیر دو ماہ میں دوسری بار جا رہے امریکہ")
