سری نگر/ آواز دی وائس
جموں و کشمیر کے پہلگام میں 26 سیاحوں کے بہیمانہ قتل میں ملوث دہشت گرد تاحال سیکیورٹی فورسز کی گرفت میں نہیں آئے ہیں۔ اس واقعے کے بعد کشمیر پولیس نے جنوبی کشمیر کے کئی علاقوں میں تین مطلوب دہشت گردوں کے پوسٹر دیواروں پر چسپاں کر دیے ہیں۔ ان دہشت گردوں میں عادِل حسین، علی، اور ہاشم شامل ہیں، جو پہلگام دہشت گردانہ حملے میں ملوث بتائے جا رہے ہیں۔
پولیس کا کہنا ہے کہ یہ دہشت گرد حملے کے بعد جنوبی کشمیر کے گھنے جنگلات میں چھپ گئے ہیں۔ پوسٹرز میں یہ تینوں بندوقیں تھامے دکھائی دے رہے ہیں۔ عوام سے اپیل کی گئی ہے کہ اگر یہ کسی بھی مقام پر نظر آئیں تو فوراً اطلاع دی جائے۔
پوسٹر میں درج اعلان کے مطابق
یہ افراد کشمیر میں دہشت گردانہ سرگرمیوں میں ملوث ہیں۔ ان کی گرفتاری یا نشاندہی کرنے والے کو 20 لاکھ روپے تک کا انعام دیا جائے گا۔ اگر کوئی انہیں پناہ دیتا ہے یا مدد کرتا ہے تو اس کے خلاف سخت قانونی کارروائی ہوگی۔
اطلاع دینے کے لیے دیے گئے نمبرات
۔8491871831
۔7408425711
پولیس کا کہنا ہے کہ جو لوگ کشمیر میں امن خراب کرتے ہیں، وہ ملک اور انسانیت کے دشمن ہیں، اور ان کے خلاف سخت کارروائی کی جائے گی۔
حملے کا پس منظر
سی آر پی ایف بٹالین کے کمانڈنگ آفیسر راجیش کمار جب کیمپ سے باہر نکلے تو انہوں نے کئی خچر والوں اور سیاحوں کو پہاڑی سے نیچے آتے دیکھا۔ پوچھنے پر خچر والوں نے بتایا کہ صاحب، اوپر بیسرن میں کچھ ہوا ہے۔۔۔شاید فائرنگ ہوئی ہے۔ راپڈ ایکشن ٹیم نے تقریباً 25 کمانڈوز کے ساتھ مشکل اور پھسلن بھرے راستے کو عبور کر کے 40-45 منٹ میں جائے وقوعہ پر پہنچ کر کارروائی شروع کی۔
سی آر پی ایف نے فوری طور پر ارد گرد کے علاقوں میں چوکیاں قائم کر دیں اور سیکیورٹی بڑھا دی۔ اس موقع پر ڈیلٹا یونٹ کی کمپنی کمانڈر، اسسٹنٹ کمانڈنٹ راشی سکرور نے خواتین اور بچوں کی دیکھ بھال کا ذمّہ سنبھالا، کیونکہ کئی لوگ زخمی، خوفزدہ اور چیخ رہے تھے۔
فوج جب جائے واردات پر پہنچی تو دیکھا کہ تین افراد گولی لگنے سے زمین پر پڑے ہیں، جبکہ کئی عورتیں، بچے اور مرد مختلف جگہوں پر چھپے ہوئے تھے۔ فورس نے زخمیوں کو محفوظ مقام پر منتقل کیا اور علاقے میں دہشت گردوں کی تلاش شروع کی۔ بعد میں مقامی پولیس بھی پہنچ گئی اور دونوں فورسز نے حالات کو قابو میں لانے کی کوشش کی۔
