سری نگر/ آواز دی وائس

جموں و کشمیر کے پہلگام کی بیسرن وادی میں ہونے والے دہشت گرد حملے میں 26 افراد جاں بحق ہو گئے۔ خیال کیا جا رہا ہے کہ اس قتل عام کے پیچھے دو مشتبہ پاکستانی دہشت گردوں کا گروپ ہے جو تقریباً ڈیڑھ سال قبل دراندازی کے ذریعے ہندوستان میں داخل ہوا تھا۔ یہ گروپ سانبہ-کٹھوعہ کے علاقے سے باڑ کاٹ کر ہندوستان آیا اور تب سے کئی دہشت گردانہ حملوں میں ملوث رہا ہے۔

اننت ناگ پولیس نے دونوں پاکستانی دہشت گردوں کی شناخت علی بھائی عرف طلحہ اور ہاشم موسیٰ عرف سلیمان کے طور پر کی ہے۔ پولیس پہلے ہی ان کے خاکے جاری کر چکی ہے، ساتھ ہی لشکر طیبہ سے وابستہ مقامی دہشت گرد عادل حسین ٹھوکر کا بھی خاکہ جاری کیا گیا ہے، جسے پہلگام حملے کا تیسرا حملہ آور مانا جا رہا ہے۔ پولیس نے ان کی گرفتاری میں مدد دینے والی معلومات پر 20 لاکھ روپے کے انعام کا اعلان کیا ہے۔

عادل  حسین 2018 میں اسٹوڈنٹ ویزا پر پاکستان گیا تھا

اننت ناگ کے بجبیھرا علاقے کا رہائشی عادل حسین ٹھوکر 2018 میں واہگہ بارڈر کے ذریعے اسٹوڈنٹ ویزا پر پاکستان گیا تھا، لیکن وہاں جا کر لشکر طیبہ کے دہشت گرد تربیتی کیمپ میں شامل ہو گیا۔  وہ ڈیڑھ سال قبل دو پاکستانی دہشت گردوں کے ساتھ واپس آیا تھا۔ پاکستان جانے سے قبل عادل  کشمیر کے ایک نجی اسکول میں پڑھاتا تھا۔

چین نے پہلگام حملے کی فوری تحقیقات کا مطالبہ کیا

حکام کے مطابق فوج اور نیم فوجی دستے اننت ناگ کے بالائی علاقوں میں چھان بین کر رہے ہیں کیونکہ شبہ ہے کہ دہشت گرد وہیں چھپے ہو سکتے ہیں۔ جموں و کشمیر پولیس کے ایک افسر نے بتایا کہ وہ دہشت گردوں کی تلاش قبائلی برادری سے ملنے والی معلومات کی بنیاد پر کر رہے ہیں۔ وہیں ہاشم موسیٰ عرف سلیمان پر گزشتہ سال 20 اکتوبر کو سونمرگ میں زیڈ-موڑ سرنگ پر حملے میں شامل ہونے کا بھی شبہ ہے۔

ایک سیکیورٹی اہلکار نے بتایا کہ عینی شاہدین کو دہشت گردوں کی کئی تصاویر دکھائی گئیں، جن میں سے ایک تصویر سے موسیٰ کی شناخت ہوئی۔ اسی شناخت کی بنیاد پر باقیوں کی بھی پہچان کی گئی۔ رپورٹ کے مطابق موسیٰ کو سب سے زیادہ تربیت یافتہ اور جنگلات میں رہنے کا ماہر مانا جاتا ہے۔ ذرائع کے مطابق وہ انہی دراندازوں میں سے ایک ہو سکتا ہے۔

تحقیقات جاری ہیں

تحقیقی ٹیم یہ جاننے میں بھی مصروف ہے کہ یہ گروپ اگست 2023 میں جنوبی کشمیر کے کولگام ضلع میں تین فوجی اہلکاروں کی ہلاکت میں بھی ملوث تھا۔ ذرائع کے مطابق ان دہشت گردوں پر گزشتہ سال مئی میں جموں کے پونچھ ضلع میں ہونے والے حملے میں ملوث ہونے کا بھی شک ہے، جس میں فضائیہ کا ایک جوان شہید اور چار دیگر زخمی ہوئے تھے۔ این آئی اے کی تفتیش سے یہ بھی معلوم ہوا ہے کہ فائرنگ کے دوران دہشت گردوں نے اپنے ساتھیوں سے جلدی فرار ہونے کی اپیل کی تھی تاکہ وہ بچ کر نکل سکیں۔