نئی دہلی: اپوزیشن اراکینِ پارلیمنٹ نے ایپسٹین فائل سے متعلق معاملے میں مرکزی وزیر ہردیپ سنگھ پوری کے استعفے کا مطالبہ کرتے ہوئے جمعہ کو پارلیمنٹ کے احاطے میں احتجاج کیا۔ کانگریس اور چند دیگر اپوزیشن جماعتوں کے ارکان پارلیمنٹ نے پارلیمنٹ ہاؤس کے مکر دروازے کے قریب جمع ہو کر مظاہرہ کیا اور ’’ہردیپ پوری استعفیٰ دو‘‘ کے نعرے لگائے۔

انہوں نے ایک بڑا بینر بھی اٹھا رکھا تھا جس پر جیفری ایپسٹین اور پوری کی تصاویر تھیں۔ پیٹرولیم کے وزیر پوری نے بدھ کے روز اپنے خلاف الزامات عائد کرنے پر کانگریس رہنما راہل گاندھی پر جوابی حملہ کرتے ہوئے کہا تھا کہ ان کی جیفری ایپسٹین سے ’’کچھ مواقع پر‘‘ ملاقات ہوئی تھی، لیکن ان کے درمیان ہونے والی گفتگو کا ان جرائم سے کوئی تعلق نہیں تھا جن میں امریکی جنسی مجرم ملوث تھا۔ پوری کی وضاحت گاندھی کے اس دعوے کے بعد سامنے آئی جس میں انہوں نے کہا تھا کہ مرکزی وزیر کا نام امریکہ میں جاری ’’ایپسٹین فائلز‘‘ میں سامنے آیا ہے۔