نئی دہلی: وزیر داخلہ امت شاہ نے جمعہ کے روز لوک سبھا میں کہا کہ اپوزیشن کا ‘انڈیا’ اتحاد اگر مگر اور لیکن کا سہارا لے کر خواتین ریزرویشن کی مخالفت کر رہا ہے۔ انہوں نے خواتین ریزرویشن ایکٹ سے متعلق آئین (131ویں ترمیم) بل 2026، حد بندی بل 2026 اور یونین ٹیریٹری لا (ترمیم) بل 2026 پر بحث کا جواب دیتے ہوئے کہا کہ جو لوگ حد بندی (پریسیمن) کی مخالفت کر رہے ہیں، وہ دراصل کہیں نہ کہیں درج فہرست ذاتوں اور درج فہرست قبائل (ایس سی-ایس ٹی) کے لیے محفوظ نشستوں میں اضافے کی بھی مخالفت کر رہے ہیں۔

امت شاہ نے مختلف انتخابی حلقوں کے درمیان آبادی کے عدم توازن کا حوالہ دیتے ہوئے کہا کہ اسے صرف حد بندی کے ذریعے ہی درست کیا جا سکتا ہے اور اپوزیشن کو اس میں تعاون کرنا چاہیے۔ انہوں نے کہا، “سب نے ایوان میں کہا کہ وہ خواتین ریزرویشن کے حق میں ہیں، لیکن جب باریکی سے دیکھا جائے تو ‘انڈیا’ اتحاد کے ارکان نے اگر مگر اور لیکن کا استعمال کرتے ہوئے اس کی مخالفت کی ہے۔

انہوں نے مزید کہا کہ کچھ حلقوں میں آبادی 39 لاکھ تک پہنچ گئی ہے جبکہ کچھ میں صرف 60 ہزار ہے، ایسے میں ارکان پارلیمنٹ کے لیے اپنے حلقوں کے عوام سے رابطہ رکھنا مشکل ہو جاتا ہے۔ انہوں نے کہا کہ اسی مسئلے کو مدنظر رکھتے ہوئے وقتاً فوقتاً حد بندی کا انتظام کیا گیا ہے۔