اروند

جاسوسی کی دنیا پر ایک مشہور کتاب ہے: 'گڈینز اسپائز: دی سیکرٹ ہسٹری آف دی موساد'۔ اس کے مصنف ہیں گورڈن تھامس۔ بی بی سی پر نشر ہونے والی دستاویزی فلم ‘دی موساد: اسرائیل کے خفیہ جنگجو’ میں گورڈن نے میونخ اولمپک حملے کے بعد کے ایک مشن کا ذکر کرتے ہوئے کہا:

“اطلاع ہی وہ ہتھیار ہے جو جنگ کا فیصلہ کرتی ہے۔”

یہ کوئی پیچیدہ فلسفہ نہیں بلکہ عام فہم بات ہے، لیکن کوئی عام بات جب کسی خاص شخصیت کی زبان سے نکلے تو وہ ‘خاص’ بن جاتی ہے۔ تو اسی اصول کو ذہن میں رکھتے ہوئے آپریشن سیندور کودیکھیے۔ بلاشبہ، مرحلہ وار بڑھتے ہوئے اس آپریشن کی زد میں پاکستان کے فوجی ٹھکانے بھی آ گئے، مگر اس آپریشن کا بنیادی ہدف کیا تھا؟پاکستان میں سرگرم دہشت گرد کیمپوں کا صفایا — جس میں ہمیں سو فیصد کامیابی ملی — اور یہ ممکن ہوا، کیونکہ ہمارے پاس درست انٹیلی جنس تھی۔یقیناً یہ کارنامہ ہمارے قومی سلامتی مشیر، ہندوستان کے ‘جیمز بانڈ’ اجیت ڈوبھال کا ہے، جنہوں نے خاص طور پر انسدادِ دہشت گردی کے معاملے میں ہندوستان کی پالیسی کو بالکل بدل کر رکھ دیا ہے۔

11 مئی کی شام جنگ بندی کے بعد کی گئی پریس کانفرنس میں بری فوج کی طرف سے ڈی جی ایم او لیفٹیننٹ جنرل راجیوش گھئی، فضائیہ کی طرف سے ڈی جی اے او ایئر مارشل اے کے بھارتی، بحریہ کی طرف سے ڈی جی این او وائس ایڈمرل اے این پرمود اور میجر جنرل ایس ایس شردھا شامل تھے۔

اس میں واضح طور پر بتایا گیا کہ ‘آپریشن سیندور ’ کا ہدف پاکستان کی زمین پر موجود دہشت گرد کیمپ تھے، اور ہندوستان نے 6-7 مئی کی رات ان میں سے نو ٹھکانوں کو انتہائی درستگی سے تباہ کر دیا۔پریس کانفرنس میں یہ بھی بتایا گیا کہ ہندوستان کو کئی دیگر دہشت گرد کیمپوں کی بھی معلومات تھیں، اور یہ بھی معلوم تھا کہ پہلگام حملے کے بعد کچھ کیمپ دہشت گردوں نے خالی کر دیے تھے۔اسی لیے صرف ان نو مقامات کو نشانہ بنایا گیا، جہاں دہشت گردوں کی موجودگی کے امکانات سب سے زیادہ تھے۔ اس سے دو باتیں ثابت ہوتی ہیں:

1.       اجیت ڈوبھال کی قیادت میں ہندوستان کا انٹیلی جنس نیٹ ورک - جس میں انسانی اور تکنیکی دونوں ذرائع شامل ہیں — اتنا طاقتور ہے کہ وہ عملی کارروائی کے لیے مکمل معلومات فراہم کرنے کی صلاحیت رکھتا ہے۔

2.       یہ نیٹ ورک ہمہ وقت فعال ہے۔ اگر ایسا نہ ہوتا تو پہلگام حملے کے چند ہی دن بعد اتنی مؤثر اور کامیاب کارروائی ممکن نہ ہوتی۔

آپریشن سیندور کے تحت:

•        جیشِ محمد کے 4

•        لشکرِ طیبہ کے 3

•        حزب المجاہدین کے 2 کیمپ تباہ کیے گئے۔

ان میں شامل تھے:

•        بہاولپور کا ’مرکز سبحان اللہ‘ (جیش کا مرکزی تربیتی مرکز)

•        مرادکے کا ’مرکزِ طیبہ‘ (لشکر کا مرکز جہاں اجمل قصاب اور ڈیوڈ ہیڈلی نے ٹریننگ لی)

•        تہرہ کلاں کا ’سرجل کیمپ‘ (جہاں پلوامہ حملہ آوروں کی تربیت ہوئی)

•        سیالکوٹ کا حزب المجاہدین کا ’محمونہ زویا کیمپ‘ (جہاں پٹھان کوٹ ایئربیس حملے کی منصوبہ بندی ہوئی)

•        مظفرآباد کا لشکر کا ’شاوئی نالہ کیمپ‘ (جہاں پہلگام حملہ آوروں کو ٹریننگ ملی)

•        اور ’مرکز عباس‘ جیسے خودکش حملہ آوروں کی تیاری کے مراکز بھی۔

بہاولپور کا ’مرکز سبحان اللہ‘ اس بات کی مثال ہے کہ ہندوستان کے پاس کس قدر ٹھوس معلومات تھیں۔ اس کیمپ پر حملے میں مولانا مسعود اظہر کے خاندان کے 10 افراد مارے گئے۔

اہم دہشت گرد مارے گئے

ہندوستانی کارروائی میں لگ بھگ 100 دہشت گرد مارے گئے جن میں شامل تھے:

•        ابو جندال عرف مدثر (لشکر کا ٹرینر، اجمل قصاب و ہیڈلی کا انسٹرکٹر)

•        یوسف اظہر (جیش کا رہنما، IC-814ہائی جیکنگ کا ماسٹر مائنڈ)

•        حافظ محمد جمیل (جیش بہاولپور مرکز کا سربراہ، مسعود اظہر کا سالا)

•        ابو آکاش عرف خالد (لشکر کا اسمگلر، افغان اسلحہ کی سپلائی میں ملوث)

•        محمد حسن خان (جیش کا POKآپریشن کمانڈر)

•        عبدالمالک رؤف (لشکر کا اہم کمانڈر)

ممکن ہے اس حملے میں اور بھی بڑے دہشت گرد مارے گئے ہوں جن کے نام آنے میں وقت لگے یا کبھی نہ آئیں، مگر پاکستان کی مبہم و گنگ ردعمل بتاتی ہے کہ وہ ایسی جگہ مار کھا چکا ہے جہاں دکھانا بھی مشکل ہے اور چھپانا بھی

۔اجیت ڈوبھال کا طریقۂ کار

اجیت ڈوبھال کی سربراہی میں ہندوستان کی انسدادِ دہشت گردی پالیسی اب یہ بن چکی ہے:

ڈوزیئر بعد میں، دوا کی خوراک فوراً

چاہے 2016 میں اڑی حملے کے بعد سرجیکل اسٹرائیک ہو،

یا 2019 میں پلوامہ حملے کے بعد بالا کوٹ ایئر اسٹرائیک،

یا حالیہ آپریشن سیندور — ہندوستان نے یہ واضح کر دیا ہے کہ وہ ہر حملے کا جواب دے گا، اور ایسا جواب دے گا کہ پاکستان کی قیمت ہر بار بڑھتی جائے گی۔

جب بیماری کی اصل جڑ کا علم ہو، تو علاج مؤثر ہوتا ہے۔ برسوں تک پاکستان میں انڈر کور ایجنٹ کے طور پر کام کرنے والے، اور کہوٹہ کے جوہری پروگرام کو اپنی غیرمعمولی ذہانت سے بے نقاب کرنے والے ڈوبھال بخوبی جانتے ہیں کہ پاکستان میں اسٹیبلشمنٹ اور دہشت گردی کا گٹھ جوڑ کیسے کام کرتا ہے۔اسی لیے ان کی قیادت میں ہندوستان نے جو انسدادِ دہشت گردی حکمت عملی اپنائی ہے، وہ بے حد کامیاب رہی ہے۔

اجیت ڈوبھال، جنہوں نے:

•        1988 میں آپریشن بلیک تھنڈر کی قیادت کی

•        1999 میں کاندھار ہائی جیکنگ میں مرکزی مذاکرات کار کا کردار ادا کیا

•        2014 میں عراق سے 546 نرسوں کی واپسی ممکن بنائی

•        2015 میں میانمار میں NSCNکے خلاف کامیاب کارروائی کی

•        2017 میں ڈوکلام تنازعہ پر چین کو پسپائی پر مجبور کیا

— ان کے بارے میں جو باتیں عوامی دائرے میں ہیں، ان سے کہیں زیادہ کہانیاں ایسی ہیں جو شاید کبھی منظرِ عام پر نہ آئیں۔اتنا ضرور طے ہے کہ پہلگام میں پاکستان کے حمایت یافتہ دہشت گرد حملے کے جواب میں دہشت گردی کے ٹھکانوں پر چڑھائی کر کے ہندوستان نے واضح پیغام دیا ہے-اسلام آباد اب یہ خام خیالی ترک کر دے کہ وہ دہشتگردی کرا کے بچ نکلے گا۔اس سب کے پیچھے اجیت ڈوبھال کی فوجی، خفیہ، اور اسٹریٹجک سطح پر بنی جارحانہ دفاعی حکمت عملی کلیدی کردار ادا کر رہی ہے۔شاید کبھی معلوم نہ ہو کہ تین دن تک جاری رہنے والے آپریشن سیندور کے دوران ڈوبھال نے کتنے گھنٹے نیند کی، یا کی بھی یا نہیں -لیکن دہشت گردستان کو اب یہ بخوبی اندازہ ہو چکا ہو گا کہ کسی بھی حملے کے بعد، اس میں ملوث عناصر کا ہمیشہ کے لیے خاموش ہو جانا یقینی ہوتا جا رہا ہے۔

(مصنف پاکستان اور بلوچستان امور کے ماہر ہیں)