ترواننت پورم: مرکزی وزیر داخلہ امت شاہ نے ہفتہ کو ترواننت پورم میں بھارتیہ جنتا پارٹی (بی جے پی) کی ریاستی کمیٹی کے نئے دفتر "مارارجی بھون" کا افتتاح کیا۔ انہوں نے پارٹی کا پرچم لہرایا اور اس کے بعد ایک پودا بھی لگایا۔ امت شاہ نے عوام سے خطاب کرتے ہوئے کہا کہ اگر کیرالہ کی ترقی چاہتے ہیں تو بی جے پی کی حکومت بننا ضروری ہے۔
انہوں نے کہا کہ وزیر اعظم نریندر مودی کا خواب ہے وکست بھارت یعنی ترقی یافتہ بھارت بنانا۔ اپنے خطاب میں امت شاہ نے دہشت گردی اور پاکستان کا بھی ذکر کیا۔ امت شاہ نے الزام لگایا کہ ایل ڈی ایف (لیفٹ ڈیموکریٹک فرنٹ) اور یو ڈی ایف (یونائٹیڈ ڈیموکریٹک فرنٹ) کی حکومتوں نے کیرالہ کو راشٹروادی مخالف طاقتوں (ملک دشمن عناصر) کے لیے پناہ گاہ بنا دیا ہے۔
انہوں نے کہا:اگر عوام کیرالہ میں تبدیلی چاہتے ہیں تو یہ تبدیلی ایل ڈی ایف یا یو ڈی ایف نہیں لا سکتے۔ اس کے لیے این ڈی اے (راجگ) اور بی جے پی کو ووٹ دینا ہوگا۔ انہوں نے کہا کہ بی جے پی کیرالہ کی سیاسی سرگرمیوں سے بخوبی واقف ہے اور ریاست میں این ڈی اے کی حکومت بنانی ہے۔ ہمارے وزیر اعظم ترقی یافتہ بھارت کی تشکیل میں مصروف ہیں۔
مرکزی وزیر داخلہ نے کہا کہ دہشت گردی اور پاکستان کو مؤثر جواب صرف وزیر اعظم مودی اور بی جے پی ہی دے سکتی ہے۔ انہوں نے کہا:ہماری حکومت نے پہلگام حملے کے بعد 'آپریشن سندور' کے تحت دہشت گردوں کو گھس کر مارا۔امت شاہ نے کہا: بی جے پی نے کارکنوں کی کانفرنس کو دیگر سیاسی پارٹیوں کے عوامی جلسوں جتنا بڑا بنا دیا ہے، اور یہ کیرالہ میں بی جے پی کے مستقبل کی علامت ہے۔ اب ہم ترقی یافتہ کیرالہ کا تصور کر رہے ہیں۔
انہوں نے کہا کہ اگرچہ بی جے پی اور کمیونسٹ پارٹی دونوں کیڈر بیسڈ پارٹیاں ہیں، لیکن ان میں فرق یہ ہے کہ کمیونسٹ پارٹی صرف اپنے کیڈر کی ترقی کرتی ہے، جبکہ بی جے پی پورے سماج کی ترقی کے لیے کام کرتی ہے۔ ہندوستان کے وزیر داخلہ امت شاہ نے ہفتے کے روز کہا کہ بھارتیہ جنتا پارٹی (بی جے پی) کے لیے کیرالہ میں وزیر اعلیٰ بننا اتنا ضروری نہیں جتنا یہ یقینی بنانا ضروری ہے کہ ریاست میں پارٹی کا دفتر "وکست کیرلم" (ترقی یافتہ کیرالہ) مشن کا مرکز بنے۔
امت شاہ نے بی جے پی کی نئی ریاستی کمیٹی کے دفتر کا افتتاح کرنے کے بعد پتھریکندم میدان میں منعقد وارڈ سطحی لیڈرشپ میٹنگ سے خطاب کرتے ہوئے ہزاروں پارٹی کارکنوں اور حامیوں کے مجمع سے یہ بات کہی۔ اس موقع پر امت شاہ نے بی جے پی کے "وکست کیرلم" مشن کا لوگو اور نعرہ (مَوٹو) بھی جاری کیا۔ انہوں نے کہا، ’’وکست بھارت (ترقی یافتہ بھارت) کا راستہ وکست کیرلم سے ہوکر جاتا ہے۔
اس لیے اب سے بی جے پی کا اصل مقصد 'وکست کیرلم' ہوگا۔‘‘ مرکزی وزیر داخلہ نے رواں سال ہونے والے مقامی بلدیاتی انتخابات اور اگلے سال منعقد ہونے والے اسمبلی انتخابات کے لیے پارٹی کی مہم کی شروعات سے قبل ریاستی کمیٹی کے نئے دفتر ’’مارارجی بھون‘‘ کا افتتاح کیا۔
امت شاہ جمعہ کی رات دیر گئے کیرالہ پہنچے اور بی جے پی کی ریاستی اکائی کے سابق صدر آنجہانی کے جی مارار کے مجسمے پر گلہائے عقیدت پیش کیا۔ کے جی مارار کا کانسی کا مجسمہ نئے دفتر کے مرکزی ہال میں نصب کیا گیا ہے۔ نئے دفتر کا معائنہ کرتے وقت امت شاہ کے ساتھ بی جے پی کی کیرالہ اکائی کے صدر راجیف چندرشیکھر اور دیگر سینئر ریاستی رہنما بھی موجود تھے۔
بی جے پی کی طرف سے جاری کردہ امت شاہ کے شیڈول کے مطابق، مرکزی وزیر داخلہ شام چار بجے تک ترواننت پورم سے کنّور روانہ ہوں گے، جہاں وہ دہلی واپسی سے پہلے تلی پرمبا میں واقع مشہور راجاراجیشور مندر میں درشن کریں گے۔ امت شاہ کے کنّور پہنچنے سے قبل، ضلع مجسٹریٹ نے حفاظتی اقدامات کے تحت ایئرپورٹ کے آس پاس پانچ کلومیٹر کے دائرے میں ڈرون، پیرا گلائیڈر، ہاٹ ایئر بیلون یا کسی بھی بغیر پائلٹ فضائی سواری کے استعمال پر تین دن کے لیے پابندی عائد کر دی۔
