متھرا: اتر پردیش کے وزیر اعلیٰ یوگی آدتیہ ناتھ نے جمعرات کو کہا کہ ہندوستان اپنے ورثے سے جڑ کر ہی ترقی یافتہ ملک بننے کا خواب پورا کر سکتا ہے۔ متھرا میں منعقدہ ایک پروگرام سے خطاب کرتے ہوئے یوگی نے کہا کہ بھارتیہ جنتا پارٹی (بی جے پی) کی حکومت میں ریاست میں بڑی تبدیلی آئی ہے اور اب یہاں فسادات اور بدامنی کے خوف کے بجائے تہوار اور مذہبی تقریبات منائی جاتی ہیں۔ یوگی نے الزام لگایا کہ طویل عرصے تک ترقی کو صرف سڑک، بجلی، پانی، عمارتوں اور صنعتوں کے نقطۂ نظر سے دیکھا گیا، جبکہ ورثے کو نظر انداز کیا گیا۔ انہوں نے کہا کہ ترقی کے نام پر ورثے کی توہین ہوتی رہی اور تاریخ کے ہیروز کو ہندوستان کی یادداشت سے مٹانے کی کوششیں کی گئیں۔

متھرا کی تاریخ اور مندروں پر مبینہ حملوں کا ذکر کرتے ہوئے یوگی نے کہا کہ بار بار ہونے والے حملوں کے باوجود سناتن روایات برقرار رہیں۔ انہوں نے کہا، ’’غیر ملکی حملہ آوروں نے مندروں کو تباہ کر دیا، لیکن کیا وہ شری کرشن کی یاد کو مٹا سکے؟ کیا وہ رادھا رانی کی یاد کو مٹا سکے؟ کیا جنم اشٹمی کا تہوار رک گیا؟ کیا ورنداون میں بھکتی رک گئی؟ کیا برسانہ کی ہولی رک گئی؟ کیا گووردھن کی پریکرما رک گئی؟ نہیں۔ یہی ہمارا سناتن ہے۔ یہی برج کی طاقت ہے۔‘

‘ وزیر اعلیٰ نے ایودھیا کی مثال دیتے ہوئے دعویٰ کیا کہ رام مندر کی تعمیر ایک طویل تہذیبی جدوجہد کا نتیجہ ہے۔ انہوں نے کہا، ’’یہ روایات جاری رہیں، سناتن کے جذبے کے ساتھ آگے بڑھیں اور جدوجہد کے لیے نیا جوش پیدا کرتی رہیں۔ نتیجہ یہ ہے کہ آج ایودھیا میں ایک عظیم الشان رام مندر تعمیر ہوا ہے۔‘‘ یوگی نے کہا کہ ورثہ صرف یادگاروں تک محدود نہیں ہے۔

انہوں نے کہا، ’’ورثہ ہمارے مندروں، ہماری زبان، ہمارے ادب، ہماری موسیقی، ہمارے فن، ہمارے فلسفے، ریاضی، سائنس، طب، ہنر اور علم، ہماری لوک روایات اور ہماری علمی روایت میں بسا ہوا ہے۔‘‘ وزیر اعلیٰ نے کہا، ’’ہمارا پیغام بالکل واضح ہے۔ ہندوستان اپنے ورثے سے جڑ کر ہی ترقی یافتہ ملک بننے کا خواب پورا کرے گا۔‘‘ یوگی نے کہا کہ 2025 میں اتر پردیش میں 156 کروڑ سیاح آئے، جو بہتر رابطہ نظام، قانون و انتظام اور بنیادی ڈھانچے کی ترقی کا ثبوت ہے۔

یوگی دو روزہ دورے پر کرشن کی نگری پہنچے تھے، جہاں جنم اشٹمی کے موقع سے ایک روز قبل انہوں نے متھرا ضلع میں مجموعی طور پر 1,051 کروڑ روپے کی لاگت والے 229 ترقیاتی منصوبوں کا افتتاح اور سنگ بنیاد رکھا۔ انہوں نے وزیر اعلیٰ رہائش اسکیم کے تحت 7,240 مستحقین سمیت مختلف اسکیموں کے مستحقین کو چابیاں، چیک، منظوری نامے، تقرری نامے اور ٹول کٹس وغیرہ بھی فراہم کیے۔

حکام نے بتایا کہ ان منصوبوں کے افتتاح اور سنگ بنیاد سے متھرا-ورنداون سمیت ضلع کے دیگر مذہبی مقامات پر مذہبی سیاحت، زائرین کی سہولیات، سڑکوں اور روشنی کے انتظام، خوبصورتی کاری اور مقامی دست کاری سے متعلق سرگرمیوں کو فروغ ملے گا۔